كود طنجة ///

ادانت محكمة طنجة المزدوجي مستشار عمدة طنجة بعامين ونص حسب نافذ مع الغرامة وتعويض ب48 مليون سنتيم. ابتدائية طنجة اقتنعت بخطورة الاتهامات للي تابع بها قاضي التحقيق والنيابة العامة المتهم المزدوجي٬ مستشار عمدة طنجة٬ وللي كتتعلق ببث وتوزيع ادعاءات كاذبة بهدف المس بالحياة الخاصة للأشخاص والتشهير بهم، وبث وتوزيع ادعاءات كاذبة بهدف المس بالحياة الخاصة لامرأة بسبب جنسها، والتشهير والتهديد والتمييز بسبب الانتماء، والسب والقذف العلني في حق امرأة بسبب جنسها.

ادانتها اذن بالحبس عامين ونصف حبسا نافذا وتعويض مدني قدره 48 مليون سنتيم مقسمة على أربع ضحايا.

هاد الفضيحة للي ولات مشهورة فالمغرب بقضية “العمدة مون بيبي” فضحت التواطؤ للي كاين بين الامين الجهوي ديال حزب التراكتور عبد اللطيف الغلبزوري وبين عمدة طنجة منير الليموري وللي هو الامين الاقليمي ديال حزب بنت الباشا. الغلبزوري استعمل النفوذ ديالو باش يوفر الحماية للمتهم للي سبق ترشح معاه فانتخابات مجلس الجهة الاخيرة (2021)، ودابا مستشار الليموري فالجمعية المغربية ديال رؤساء الجماعات المحلية وعضو فالكتابة الإقليمية ديال حزب التراكتور.

هاد الامين الجهوي المعروف بالانقلاب على كل واحد دعمو ومعروف عليه كيعض ليد اللي دارت فيه الخير (إلياس العماري، أحمد الادريسي، حكيم بنشماس، واخيراً عبد اللطيف وهبي) عوض ما يدير قرار بفصل المزدوجي من الحزب او على الأقل تجميد الوضعية ديالو إلى حين صدور حكم المحكمة، مشى صدر بلاغ بليد كيندد فيه باستهداف مناضلين ديال التراكتور من طرف وسائل الإعلام، ونسى ان الميثاق الأخلاقي للي كتفتخر بيه بنت الباشا كيفرض اتخاذ إجراءات تأديبية في حق كل بامي موضوع متابعة قضائية، والحال ان المزدوجي مورط فقضية جنائية خطيرة تتعلق بنهش أعراض الناس.

كولشي دابا فطنجة عارفين ان المنسق الجهوي اصبح لعبة فيد منير الليموري عمدة طنجة وكينفذ الأجندة ديالو عبر رفع تقارير مغلوطة لقيادة الحزب كيدافع فيها على عشيرو وحليفو الليموري، والمصيبة ان الغلبزوري عارف ان عمدة طنجة مورط فقضية المزدوجي وان الشبكة للي كان كيقودها المتهم والمتخصصة فالهجوم على خصوم العمدة عبر نهش الأعراض ديالهوم على صفحات الفيسبوك كانت بعلم وبتخطيط من الليموري، ومع ذلك الغلبزوري فضل المصلحة الخاصة ديالو على مصلحة الحزب.

بنت الباشا خص تكون عارفة ان التراكتور فطنجة غادي فالخسران، وان المسؤول الجهوي والإقليمي صبحو كيشوه صورة الحزب اللي اصلا خايبة، واذا ما خداتش فاطمة الزهراء المنصوري القرارات اللازمة فغير تصلي صلاة الجنازة على شي حاجة سميتها الأصالة والمعاصرة فطنحة. ها كود قالتها والأيام بيننا.

كيفاش بنت الباشا جرات على رئيس جماعة تجرأ يجبد راجلها. جرات على الامين الثالث لحزبها صلاح ابو الغالي على قضية بعيدة بزاف على الحزب. دابا مخلية عمدة طنجة مورط ف”حمزة مون بيبي” وكيمس لكذوب اللي طلقوه عليها الباميين بخصوص ميثاق اخلاقيات الحزب