كود ـ سطات//

أيدات محكمة الاستئناف بسطات، اليوم الثلاثاء 25 نونبر، الحكم اللي كانت خذاتو المحكمة الابتدائية ببرشيد فالقضية اللي هزات الرأي العام والمتعلقة بحادث إصابة الطفلة “غيثة” فوق رمال شاطئ سيدي رحال.

المحكمة الاستئنافية ثبتات الحكم الابتدائي فمجموعة ديال النقاط، ورفضات تهمة تغيير معالم الحادث اللي كان متابع بها المتهم للي توصف إعلاميا بـ”ولد الفشوش”، ولكن بقات الإدانة فالتهم الأخرى اللي مرتبطة بالسياقة فوق الكثبان الرملية ومخالفة قانون السير.

المحكمة قضات بـ: 10 شهور ديال الحبس النافذ وغرامة مالية ديال 500 درهم، هاد العقوبة جات على أساس دخول السيارة لمنطقة ممنوعة فوق الشاطئ، الأمر اللي تسبب فالحادث اللي تعرضات ليه الطفلة غيثة.

فالشّق المدني، المحكمة الاستئنافية حكمات على المتهم باش يؤدي:

تعويض مالي قدره 400 ألف درهم (40 مليون سنتيم) للطرف المدني مع استبعاد شركة التأمين من الملف.

وزادت المحكمة ومنحات المتهم أجل عشرة أيام للطعن فالحكم حسب ما كيقول القانون.

وكانت قضية الطفلة “غيثة” بقات حاضرة بقوة فوسائل الإعلام ومواقع التواصل، خصوصا بعد ما كشفات الخبرة الطبية على الأضرار الصحية اللي تعرضات ليها الطفلة، واللي مازال كتحتاج علاجات ومتابعة طبية ونفسية.

بهذا القرار، كيكون الطور الاستئنافي حسم جزء كبير من الملف، ولكن بقا الباب محلول أمام الأطراف باش يديرو طعن فالمهلة القانونية المخصصة لذلك.

القضية بقات كتسلط الضوء على خطورة السياقة فوق الشواطئ والمناطق الرملية، وعلى ضرورة احترام الضوابط حفاظا على سلامة المصطافين، خصوصا الأطفال.