كود سبور//

طالبت النيابة العامة الإسبانية اليوم الخميس إلغاء محاكمة الرئيس الأسبق للاتحاد الإسباني لكرة القدم لويس روبياليس فقضية “البوسة صحا” ملي شد لاعبة المنتخب الإسباني جيني هيرموسو وباسها فالفم ديالها بزز، على هامش حفل تتويج المنتخب النسوي لإسبانيا بكاس العالم 2023 بأستراليا، وشكتت النيابة العامة فالحياد ديال القاضي.

وأعلن المدعون العامون فبيان لهم أنهم غايستانفو الحكم الابتدائي فالقضية، وطالبو ببطلان المحاكمة وتعاود من خلال تعيين قاضي آخر معروف على الأقل بالحياد، وقالو إن القاضي خوسيه مانويل فرنانديس برييتو اللي حكم ابتدائيا فالقضية، منع وبرزط المدعية العامة فالمحاكمة، مارتا دورانتيس، من طرح بعض الأسئلة، وتجاهل بعض الأدلة، وأكدو أنه كاين “تعسف” فالحكم الابتدائي اللي صدر.

وحكمت المحكمة الإسبانية قبل أيام، بالغرامة على لويس روبياليس ويخلص 10 ألاف و800 يورو، بتهمة الاعتداء الجنسي، حيث باس بزز المهاجمة جيني هيرموسو فالفم ديالها بعد التتويج بلقب مونديال 2023، وبالمقابل حكمت المحكمة ببراءة 3 متهمين آخرين فالقضية من بينهم المدرب السابق للمنتخب الاسباني النسوي خورخي فيلدا اللي هو دابا مدرب المنتخب المغربي النسوي، بعدما كان متابع فالقضية بالضغط على هيرمسو باش تميك على روبياليس و”البوسة صحا”، ولكن خدا البراءة من هذا الشي.