كود سعيد الشاوي ////

علمت “كود” ان فضية اخرى بطلها عبد الرحيم بنضو الملياردير امبراطور لفروماج. وفق مصادر “كود” فان الشرطة الولائية باشراف النيابة العامة كتحقق فوجود فردي وسيف دخلو فكونطونير جايباه شركة “PROLAINAT MAROC” اللي رئيسها مديرها العام هو بنضو اللي عندو كاسكيطة سياسية اللي هي الامين الجهوي للبام ونائب فمجلس النواب عن هاد الحزب.

اللي عاق بهاد السيف والفردي هما الديوانة اللي حالتها على الجهات المختصة.

كاينة جهات باغية تبعد هاد القضية على الرأي العام. باغية تحمي امبراطور الفروماج اللي سبق للفرقة الوطنية للشرطة القضائية دارت انزال بخصوص كونطونير كيهم لفروماج ومدة صلاحيتو.

القضية سالات وتطوات بطريقة غريبة. ممكن تكون شكاية كيدية بالشركة ولكن خرج خبار الانزال وما خرج من بعد حتى شي خبار كيشرح للمغاربة واش لفروماج اللي دخل قابل للاستهلاك

بن ضو كان عليه الضو مؤخرا بسباب خلاف على شراء 6 هكتارات من عند صاحبو السابق وعدو اليوم ابو الغالي صلاح. الحزب دخل فهاد القضية بطريقة غير مسبوقة باش يدعم لملايري بن ضو وجراو على ابو الغالي. بنت الباشا ولات بارابلوي ديال بن ضو. كدعمو ودافع عليه.