كود هناء ابو علي ///

علمت “كود” ان قضية اولاد لملايرية اللي غتاصبو محامية فرنساوية بدات باش هاد الشابة رجعات لبلادها ودارت تحاليل واكتشفات باللي تعرضات للتخذير قبل الاغتصاب.

حسب معطيات حصلات عليها “كود” كلشي بدا بعد ما دخلات فرانسا على الخط. البنت قدمات شكاية ضد كميل بنيس ولد مول لابروفان. مصادر اخرى اكدات ل”كود” باللي خطيبها كان قدم شكاية هادي سيمانا ضد هاد البرهوش.

القضية ناضت بعد ما دخلات فرانسا على الخط. مشاو لدار كميل بنيس اللي قالت المحامية باللي تعرضات فيها للاغتصاب وفيها غادي يجيبو ولد رئيس الباطرونا شكيب لعجل وشي برهوش اخر اسمو السلاوي. طبعا كانو براهش خراين معروضين

القصة بدات بعراضة دارها ولد بنيس فدارو. عرض على صحابو ولد لعلج وولد السلاوي وعلى بنت واحد لملايري معروف فكازا والمغرب وجات المحامية وخطيبها وشي براهش خراين.

باش دخل المغربي وخطيبتو الفرنسية لقاو ديك البنت اللي كانت مصاحبة معاه. بدا الصداع ومشات فحالها بنت لملايري او جراو عليها. من بعد حسب مصادر “كود” كانت عملية الاغتصاب. فاللول جراو على الخطيب ديالها وباش قاوم سلخوه الگاردوكورات ديال كميل بنيس.

كان ما اتهمت بيه المحامية ولد بنيس مول “لابروفان” وتجبدو لخراين.

البارح لاربعا 20 نونبر باش مشات الشرطة لفيلا ولد بنيس اكتشفو باللي عندو فرادا. اييه السلاح.

هاد الشي كيبان عادي باش تشوف الفيديوات اللي كينشرهم هاد البرهوش. هو ماشي قاصر راه بعقلو. فواحد من الفيديوات كيمشي بسرعة كبيرة بزاف ف”فيراري” و”بورش”… وسط كازا. كيمشي حتى فايت 100 كلمتر فالساعة.

كاين مشاهد كيدير الرياضة فطيارة خاصة وف”يوت” كاريه. كيصور فمراكش مشهد فيه بنات بماسك كيحفرو حفرة وهو هاز بنت. بحال ايلى غادي يدفنها. تمثيل كيبين طريقة تفكير هاد الشخص وامثالو من اولاد لملايرية.

دابا هاد لملايرية باغيين يتحداو القانون. جابو شهادات من اللي كانو حاضرين باش يقولو باللي البنت مشات مع ولد بنيس بخاطرها. كيتصورو باللي كلشي ممكن يشريوه فالبلاد.

هاد البرهوش اللي ما كانش٬ كيف كيبان ففيديو ديالو٬ كيعرف يحتارم القانون٬ كان بوه اللي مات٬ داير ليه گارط كور من وعمرو 16. كلشي عندو مباح

القضاء غادي فالطريق ايلى خلاوه. كاينة ضمانات باش كلشي ياخد طريقو. بعد الحراسة النظرية يتوقع يتابعو بثلاثة ومعاهم حراس ولد بنيس فحالة اعتقال.