گود- كازا//

تواصل غرفة الجنايات الابتدائية بمحكمة الاستئناف بالدار البيضاء الاستماع للشهود فملف ما يعرف بـ”إسكوبار الصحرا”، اللي متابع فيه سعيد الناصيري الرئيس الأسبق للوداد الرياضي والقيادي السابق بحزب الأصالة والمعاصرة وآخرون، وخلال جلسة اليوم الخميس كملت المحكمة الاستماع للشاهد عبد الواحد شوقي اللي معروف أنه صاحب سعيد الناصيري وهاذ الشي أكدو فشحال من مرة قدام المحكمة.

ونفى شوقي واش يكونو الوثائق اللي قدمهم للمحكمة مزورين، وأكد أنهم صحاح ومن بينهم وثيقة هي فاتورة ديال الما والضو باسم المالي كايقول شوقي أن سعيد الناصري رسلها له عام 2016، وهضر الشاهد حتى على واحد العشاء فعام 2014 قال بللي دارو لهم شي صديق لهم بمناسبة ترأس الناصيري للوداد الرياضي، وحضروه شي 15 شخص منهم رجال أعمال وأصدقاء ديالهم، وقال إنه يتحفظ عن ذكر أسمائهم وأن ما عندهم علاقة بالموضوع واخا دفاع الناصيري ألح على هذا الشي.

ووضح عبد الوحد شوقي وهو كايجاوب على أسئلة دفاع سعيد الناصري، أن فهاد الحفل ما كانش دعم مالي للناصيري وما سمعتش أنه طلب منهم مساعدة مالية لترؤس الوداد وأن الحفل كانت فيه فرحة واحتفال، وأكد أنه فعام 2014 ما عطاش حتى شي درهم للناصيري.

المحكمة عيطت على سعيد الناصيري وعرضت عليه الوثائق اللي قدمها عبد الواحد شوقي، ومن بينها فاتورة الما والضو ديال ليديك، وجاوب الناصيري، وقال: “ما فهمتش شنو سبب تواجد هاد الوثائق هنا وإلى بغيت نجاوب على هاد الوثائق اللي عندها عملية تجارية مع الوداد خاصني نمشي نجيب الوثائق من الوداد اللي أنا ما بقيتش دابا رئيس ديال النادي.

وبخصوص فاتورة ليديك جاوب سعيد الناصيري، وقال: “الوثيقة ديال الماء والضو مزورة، وأنا أسانده (شوقي) فـ الملتمس ديالو لفتح تحقيق فهاد الوثيقة اللي جايب وأطلب من المحكمة تفتح بحث”، وكمل الناصري وقال: “هاذ شاهد ولى خصم وعندو مشكل معيا”.

ومن وراها قدم دفاع سعيد الناصيري ملتمس للمحكمة، وقال: “الوثيقة اللي تم عرضها على سعيد الناصيري المتعلقة بالربط الكهربائي باسم بنبراهيم ديال 2016 قال شوقي بلي توصل بها عن طريق الهاتف وقال أنه ملي راجع التلفون ديالو بشي 20 يوم لقاها رسلها له سعيد الناصيري وقال إنه توصل بها من هاتف الناصيري، نلتمس من المحكمة أن يضع هاتفه أمام المحكمة ويبرز لها الرسالة التي توصل بها من سعيد الناصيري 2016 وتعاين هل توجد هذه الرسالة أم لا، لكي تعاين المحكمة هذه الوثيقة ومن أرسلها اليه”.

وتقدم دفاع سعيد الناصيري مباشرة بملتمس ثاني، باستبعاد هذه الوثيقة إلى حين ثبوت أنها كانت صادرة من سعيد الناصري إلى الشاهد فالهاتف، بداعي أن هذه الوثيقة تتضمن مجموعة من المعطيات ذات الطابع الشخصي.. استعمال الوثيقة أمام المحكمة فيه معالجة لهذه المعطيات.

وبعد منها رفض الوكيل العام الملتمس ديال دفاع سعيد الناصيري ونفس الشي بالنسبة للمحكمة اللي حتى هي رفضت الملتمس.