كود كازا//

تواصل هيئة المحكمة بغرفة الجنايات الإبتدائية لدى محكمة الاستئناف بالدرالبيضاء، الاستماع للمتابعين في ملف “اسكوبار الصحرا”، اللي متهم فيه سعيد الناصيري الرئيس الأسبق للوداد الرياضي، والقيادي السابق لحزب الأصالة والمعاصرة، وعبد النبي بعيوي الرئيس السابق لجهة الشرق والقيادي السابق لحزب التجمع الوطني للأحرار، واليوم الجمعة 7 مارس 2025، تم للمير بلقاسم المنعش العقاري والفلاح بخصوص فيلا كاليفورنيا، قبل ما تقرر هيئة المحكمة الاستماع تأخير المحاكمة إلى جلسة الجمعة المقبل 11 نونبر 2025، لمواصلة الاستماع لباقي المتهمين.

وكشف المير بلقاسم المتابع فقضية “اسكوبار الصحرا” بالتزوير وتهم آخرى، انه اتفق مع سعيد الناصي على بيع الفيلا ديال الكاليفورنيا فمقر نادي الوداد الرياضي وبحضور الشهود اللي كان موظفين فالوداد، وسناو على الوعد بالبيع ولكن تعطلو فالتوثيق ديالو حيث الناصيري كان غادي مسافر مع الوداد.

بلقاسم قال انه خدا مبلغ مالي من عند سعيد الناصيري القيمة ديالو 650 مليون سنتيم، وخدا من عندو 5 الشيكات ضمانة وكل شيك القيمة ديالو 200 مليون، والعقد النهائي للبيع سنواه عام 2019، وقال انه كان كياخد كل مرة شويا ديال الفلوس من سعيد الناصيري المجموع ديالها مليار و 15 مليون، وانه كان كل مرة كايتزير وكتجيه شي طريطة كايعطي للناصيري باش ياعطيه من لفلوس اللي كايتسال، وآخر مرة خدا من عند الناصيري لفلوس كانت فالباركينگ ديال البرلمان.

وبخصوص علاقة الثقة ما بينو وبين سعيد الناصيري اللي خلات المعاملة ما بينهم توصل لهذا المستوى، جواب المير القاسم المحكمة وقال بأن سعيد الناصيري معروف كرئيس للوداد الرياضي وبرلماني وقيادي بحزب الأصالة والمعاصرة، وبالإضافة لهذا الشي فالناصيري كان فالحملة الانتخابية ديال فوزي لقجع رئيس الجامعة الملكية المغربية لكرة القدم، وانه هو (المير بلقاسم) كان رئيس للاتحاد الإسلامي الوجدي وكان طلب منو يصوت على فوزي لقجع فإنتخابات الجامعة.

وبالنسبة لعلاقتو بالحاج أحمد بنبراهيم (المالي)، وضح المير بلقاسم ان العلاقة ديالو به سطحية، وانه كان لقاء بيناتهم ملي جا بنبراهيم عندو لوجدة باش يشوف شي فيرما كان حاطها للبيع، وشي مرة جا عندو مع لطيفة رافت اللي كانت مراتو فعام 2013 وتغداو معه هو والزوجة ديالو المتوفية بالكسكس.

اما على السهرات الماجنة اللي تقال انها كانت كاتدار ففيلا كاليفورنيا وفشي فيرمة فوجدة، فالمير بالقاسم جاوب المحكمة وقال انه ما عندو حتى شي علم بهذا الشي.