سامي العلوي – گود كازا

القضاء فسطات أمر بإجراء خبرة طبية على سيدة كانت دخلات لمصحة الزيتون فسطات باش تولد العام اللي فات، ولكن الجنين ديالها مات أثناء الولادة فظروف غامضة. القرار القضائي جا بعدما إدارة المصحة رفضات تسلم لأسرة الجنين التقرير الطبي، الأمر اللي زاد من شكوكو ومعاناة الوالدين.

المحكمة حدّدت الأسبوع الجاي موعد لإجراء الخبرة الطبية فمدينة الدارالبيضاء، عند طبيب محلف، باش يحدد الأسباب الحقيقية للوفاة.

القضية بداها أب الجنين اللي رفع دعوى قضائية ضد المصحة، بعدما عيا وهو كيطلب الرابور الطبي بلا فايدة. ولّما توجه المفوض القضائي للمصحة باش ياخذ الوثيقة بشكل قانوني، لقا سيدة سميتها “دليلة” كتصدّو وكتقول ما تعطيه والو، وكتزيد عليه بهضرة ما مفهوماش، بحال: “شكون اللي ولد المرا؟” و”الرابور مازال ما واجد”، وبين جوج سميات ضاع الحق.

هاد السلوك زاد ف شكوك العائلة وخلا الأب يزيد يتشبّت بالمسطرة القانونية باش يعرف شنو وقع بالضبط لولدو، خصوصاً وأن المصحة بقات كتمارس التعتيم وما بغاتش تكشف الحقيقة.

العائلة اليوم كتسنى نتائج الخبرة الطبية اللي ممكن تكشف بزاف ديال الأمور وتكون نقطة تحول فهاد الملف اللي بدا ياخذ بعد وطني بسبب الغموض.