وكالات//

فواقعة صادمة، قدرات السلطات الميريكانية أنها تعتق شاب فولاية كونيتيكت من بعد ما كان محتجز لمدة 20 عام فغرفة مسدودة، على يد مرات باه.

الضحية كان خاصو يشعل العافية فالبيت ديالو باش يقدر يجلب انتباه فرق الإنقاذ، وهادشي هو اللي خلاه يرجع الحرية ديالو، حسب ما قالت البوليس نهار الأربعاء.

وبحسب لونكيط، البومبية فمدينة ووتربري مشاو للمكان من بعد ما توصلوا ببلاغ على حريق. منين وصلوا، لقاو الشاب عندو 32 عام، وكان فحالة صحية هزيلة بزاف.

وخلال العلاج ديالو، قال للبوليس أنه هو اللي شعل الحريق عن عمد وقال: “بغيت حريتي”، وأوضح أنه كان محتجز مللي كان عندو 11 عام.

التحقيقات بينات أن الضحية كان كيعيش معاملة قاسية طيلة هاد السنوات، وكان كيعيش بالجوع والإهمال بلا ما يتلقى أي عناية طبية، وظروف الاحتجاز ديالو كانت غير إنسانية. وقال رئيس البوليس، فيرناندو سبانيولو، فبيان رسمي: “المعاناة اللي عاشها هاد الضحية لأكثر من 20 عام حاجة مفجعة وما يمكنش تصورها”.