هناء ابو علي – كود كازا//

كاينة صورة هاد ليام دايزة البوز. شي يبارطاجيها. شي يهاجم الصحافيين اللي فيها. كلشي بسباب هاد الحملة الغريبة للي بدات بتحديد ثمن المحروقات وسالات ب”اخنوش ارحل”.

الصورة فيها رئيس الحكومة عزيز اخنوش داير سيلفي مع صحافيين منهم رضوان الرمضاني ويونس دافقير…..

حسب ما جمعات “كود”٬ هاد الصورة السيلفي كانت فشهر مارس 2018. كانت مجموعة مجموعة “ميد راديو” استضفات فاول خرجة لعزيز أخنوش كرئيس التجمع الوطني للأحرار. ديك الساعة كان وزير الفلاحة في حكومة سعد الدين العثماني. “السيلفي خداه أخنوش وأنا شخصيا اللي قلت له هاك التيليفون خذ لينا سيلفي… والحوار حقق متابعة قياسية والفيديو ما زال فيوتوب” صرح الرمضاني ل”كود”.

الصحافي ما فهمتش علاش هاد القيامة على هاد الصورة “دابا مال التصاور مع أخنوش حرام؟ أنا عندي سيلفي مع ابن كيران وسط البيرو ديالو ملي كان رئيس حكومة، وفأي حوار كنديرو كنتصور مع الضيف… ويلا عاودت تلاقيت أخنوش غنتصور معاه سيلفي…هاد الشي عادي” قال ل”كود” وزاد فتصريحو “اللي ماشي عادي هو حالة الهوس اللي واقعة، بلا ما نهضرو على التضليل والكذب والسب والحملات”.

حسب الصحافي المعروف فهاد الشي اللي واقع ماشي عفوي وكاينة وراه ماكينة. ووضح ل”كود” “ما يمكنش هاد الشي يكون عفوي، كاينة ماكينة افتراضية كتطحن أي واحد ما باغيش يدخل الصف ديال الشعبوبة، واللي باغية كلشي يضرب الطم وحتى حد ما يقرّب لأخنوش”.

الرمضاني كيف كيقول ديما باللي هو صحافي خدمتو الاخبار وباللي ماشي سياسي “أنا ماشي فاعل سياسي، أنا إعلامي كندير خدمتي واللي عندو شي حساب آخر يصرفو بعيد عليا” يختم تصريحو ل”كود”.