بني ملال كود///

مدينة قصبة تادلة عاشت واحد اللحظة مثيرة فمساء الجمعة 19 شتنبر 2025، منين الشاب محمد أ، لي حاصل على موجز، طلع لقنطرة “الجديدة” فالمدينة وقرر يدير اعتصام مفتوح، احتجاجاً على الوضعية الاجتماعية ديالو بسبب البطالة لي عايش فيها من سنين.

محمد أ، لي مزوّج وعندو وليدات، اختار يعبر بهاد الطريقة الخطيرة على الغضب ديالو من انسداد أبواب الخدمة قدّامو. ورغم أنه كان ناوي يبات فوق القنطرة، قدرات الجمعية المغربية لحقوق الإنسان تقنعو باش ينزل حفاظاً على سلامتو.

لكن الاحتجاج ما سالاش هنا، بحيث التحق به عدد كبير من سكان المدينة فمسيرة تضامنية دازت وسط الشوارع، ورفعات شعارات كاتندد بالبطالة والتهميش لي كيعاني منو شباب قصبة تادلة.

وحسب شهود ، السبب لي خلا محمد أ يدير هاد الخطوة هو الإحساس ديالو بالحرمان من حقو فالشغل رغم الكفاءة الدراسية لي عندو، وهادشي كيعكس أزمة اجتماعية واقتصادية خانقة فالمدينة، وكيطرح من جديد أسئلة كبيرة على السياسات العمومية الموجّهة للشباب حاملي الشهادات وحتى لي معندهومش.