كود الرباط//

للي بغا يتفرج فشي مسرحية غير مضحكة ومحزنة للوطن، يتفرج فجلسة الاسئلة الشفوية عشية اليوم الاثنين، بحيث ناضت قربالة بين رئيس الجلسة ادريس الشطيبي، القيادي الاتحادي المقرب من لشكر، لي حالف يرونها ويقربلها اليوم.

فاش بدا رئيس الجلسة من لول دار العصا فالرويضة ويرفض يتم تغيير ترتيب الأسئلة بحكم هو بوحدو لي عارف وحافظ القانون، وزاد وصف رئيس الفريق الاستقلالي للوحدة والتعادلية بلي فايت الحدود وجاهل بالقانون.

رئيس الفريق الاسقلالي عمر احجيرة، قال بلي غريب هادشي لي كايدير رئيس الجلسة، والاخير رد عليه بالقول :”نتا معارفش بالقانون وجاي من الشرق تكلم باش نخليك على خاطرك”.

الشطيبي لي هو عراب ادريس لشكر، وصف الاغلبية بالغوغاء وبلي باغين يتحكمو فالبرلمان وزاد قاليهم :”نتوما هو التغول ولن ارضخ لتغولكم وانتم تدوسون على القانون ومباغين حتى حاجة يؤطرها القانون وباغين الفوضى وعاودو ديرو الفوضاء والغوغائية”.

البرلمانيين الاستقلاليين مرضاوش بهاد الكلام وطلبو ياخدو الكملو لكن رئيس الجلسة رفض وقال من حقو ميعطيش الكلمة لهم.

وأضاف الشطيبي “تضيقون على المعارضة ولو كانت في رئاسة الجلسة، انا اطبق القانون، سؤالين في نفس المحور لن يقبله العقل”، موضحا :”مقابلين لا قانون ولا والو..وانا كنطبق عليك القانون نتا وأقرانك ونتا لي ميع”.
رئيس فريق البام احمد التويزي طلب رفع الجلسة لمدة باش يصلحو هاد الاشكال ديال الغوات.