كود – فاس///
قربالة كبيرة ناضت مساء اليوم الثلاثاء في إحدى الوحدات الفندقية المعروفة بمدينة فاس، اللي كان فيها لقاء يحضر فيه محسن الجزولي الوزير المنتدب لدى رئيس الحكومة المكلف بالاستثمار والالتقائية وتقييم السياسات العمومية.
وحسب ما علمته “كود”، فإن هاد القربالة ناضت بعدما وجه النائب البرلماني عزيز اللبار المنتمي لحزب الأصالة والعاصرة اتهامات للباشا وللقايد اللي تابع ليهم هاد لوطيل (مقاطعة المرينيين) المطل على المدينة العتيقة لفاس.
وظهر اللبار في فيديوهات اطلعت عليها “كود” يوجه سيلاً من الاتهامات إلى رجال السلطة، مؤكدا أنهم منعوه من حضور هذا اللقاء، مضيفا بالقول: “أنا برلماني ممثل الأمة وعندي الحق ندخل وأمثل حتى السياحة بالجهة وخافوني ندخل بالي نمشي نفضحهم، ووهاد أصلاً مكان عمومي عندي الحق ندخل نشرب قوة بحال الناس”.
كما شوهد البرلماني اللباء يصرخ بصوت مرتفع خارج هاد لوطيل، معبرا عن سخطه واستيائه من “منعه” من حضور هاد اللقاء على الاستثمار. اللبار بقا يغوت حتى طاح وهزوه مقربين منو وشربوه الما.
