وكالات//

علنات هيئة الحياة البرية فزيمبابوي، الثلاثاء، أنها غادي تقتل عدد كبير من الفيلة وتوزع لحمهم باش يستهلكوه الناس، فمحاولة منها تخفف من الزيادة الكبيرة فعدد هاد الحيوانات.

زيمبابوي، اللي كاينة فجنوب إفريقيا، فيها ثاني أكبر عدد ديال الفيلة فالعالم من بعد بوتسوانا. وقالت هيئة المتنزهات والحياة البرية اللي كتعرف بـ”زيمباركس”، فبلاغ، أن العملية غادي تبدا فواحد المحمية كبيرة فجنوب شرق البلاد، وغادي تستهدف فالبداية 50 فيل.

ما قالوش شحال بالضبط من فيل غادي يتقتل فالمجموع، ولا شحال غادي تبقى العملية دايرة.

واحد المسح الجوي داروه فـ2024 بيّن أن المحمية اللي سميتها “سيف فالي” فيها 2550 فيل، مع العلم أن الطاقة الاستيعابية ديالها ما كتفوتش 800 فيل، حسب “زيمباركس”.

وخلال الخمس سنين اللي فاتت، تنقلو أكثر من 200 فيل لحدائق وطنية أخرى.

فالبلاغ، قالو إن لحم الفيلة اللي غادي يتم قتلهم غادي يتوزع على السكان المحليين، أما العاج فغادي يبقى ملك للدولة وغادي يتحط فحدائق زيمبابوي باش يتحفظ.

زيمبابوي ما كتقدرش تبيع مخزون العاج ديالها بسبب الحظر العالمي على تجارة العاج.

وهاد الإعلان جا فنهار من بعد ما تشدّو 4 أشخاص فـ العاصمة هراري وكانو عندهم أكثر من 230 كيلو ديال العاج، وكانو كيقلبو على اللي يشريه.