كود كازا//

وزير العدل عبد اللطيف وهبي أعلن على واحد الخطوة جديدة غادي تغيّر بزاف فطريقة التعامل مع السجناء اللي سالاو العقوبة ديالهم، بحيث غادي تولي عندهم الفرصة يحصلو على سجل عدلي نقي، بلا ما تبقى فيه الإشارة للعقوبات اللي دازو منها، باش يسهل عليهم يرجعو يخدمو ويعيشو بكرامة.

وخلال جلسة فالبرلمان، نهار الاثنين 3 نونبر 2025، قال وهبي ان السجناء اللي شاركو فبرامج التأهيل داخل السجن، وتعلمو مهن أو خداو شواهد دراسية، غادي يستافدو من هاد السجل الجديد اللي ما فيهش العقوبة السابقة، وهاد الشي غادي يشجعهم يندمجو فالحياة المهنية والاجتماعية من بعد ما يخرجو.

وأكد الوزير أن هاد الخطوة داخلة فمقاربة تصالحية جديدة، كتشوف أن “العقوبة كتسالي ملي كتسالي المدة ديالها”، وأن الهدف من السجن هو الإصلاح ماشي الإقصاء. وزاد وزير العدل وقال أن الناس اللي دازو من العقوبات البديلة غادي يترد ليهم الاعتبار بشكل أوتوماتيكي.

وهبي كشف حتى على أن الوزارة خدامة دابا على رقمنة هاد العملية، وغادي يكون نظام معلوماتي كيمسح العقوبات القديمة من السجل العدلي تلقائيا بعد مدة معينة، إلا ما ارتكبوش أي مخالفة جديدة. الهدف، حسب كلامو، هو “نبنيو من جديد الثقة بين المواطن والدولة بعد العقوبة”.

وختم الوزير بالقول أن هاد الإصلاح جزء من رؤية شاملة كتعتمدها وزارة العدل، وكتسعى لعدالة إنسانية وتصالحية، كترد الاعتبار للناس اللي تابو وبغاو يبداو حياة جديدة بعيد على ماضيهم.