كود- حسني دكالي وعثمان الشرقي///

في لقاء حصري مع گود، فتحات لينا الفنانة الكبيرة حادة أوعكــي قلبها، وعاودات لينا بتفاصيل صادقة على حياتها الشخصية ومسارها الفني الطويل، فهاد الجلسة الاستثنائية، رجعات بنا مي حادة اللور، لمرحلة الصغر، كيفاش هربات من دار راجلها وهي مزال صغيرة بعد زواج تفرض عليها لي غايولي البداية اللي خلاتها توقف على رجليها وتبني مستقبل جديد بصوتها وفنها.

ومن بين اللحظات القوية اللي هضرات عليها الفنانة حادة، كان اللقاء ديالها مع الملك الحسن الثاني فالصخيرات، وسفرها لعدة دول، وكيفاش قدرات ترفع الأغنية الأمازيغية والشعبية للخشبات العالمية، فريق ݣود ملي زار دارها لقاها ”زاوية حادة اوعكي“ لي كتعيًش بزاف دالنفوس، عيالات كبار من عائلتها، فوضعية صحية صعبة، ساكنين معاها وعايشين بفضلها، حادة مبقاتش غير  فنانة، ولكن عوين لهلها والجيران ولحباب، كتعاون، كتداوي، وكتصرف من جيبها. هاد الجانب الإنساني كيبين شحال هاد السيدة كبيرة بقلبها قبل صوتها، وفهاد اللقاء لي غادي يتنشر صوت وصورة، غادي نتعرفو على تفاصيل جديدة على حياتها وفنها اكتر.