كود سبور//

خرج المنتخب الوطني المغربي متفوق على منتخب إفريقيا الوسطى فالماتش اللي بادي بين المنتخبين فهاد اللحظات من مساء اليوم السبت فالتيران الشرفي لوجدة، برسم الجولة 3 من إقصائيات كاس إفريقيا2025.

وسالا الشوط الاول بين المنتخب المغربي ومنتخب إفريقيا الوسطى بنتيجة 4 لزيرو، وهو الهدف اللي ماركاه عبد الصمد الزلزولي فالدقيقة 18، بعدما استغل رجوع الكرة من عند الكول ديال إفريقيا الوسطى بعد فراب ديال سفيان رحيمي، وقدر عز الدين أوناحي يعزز النتيجة بهدف ثاني، ماركاه من تسديدة واعرة فالدقيقة 38، بعدما تلاعب إلياس بنصغير بدفاع أفريقيا الوسطى وعطى الكورة ليوسف بلعمري اللي عطى الالسيست لأونحي وهو يصيفطها نيشان للشبكة، ومن وراها زاد أشرف حكيمي الهدف الثالث فالدقيقة 45، بعدما ختم تيكي تاكا مغربية بتسديدة فالشبكة ديال إفريقيا الوسطى، اللي نهارو وراها وزادهم عز الدين أوناحي هدف رابع فالدقيقة 46 بعد أسيست ديال عبد الصمد الزلزولي.

للإشارة فالشوط الاول من الماتش بين المغرب وأفريقيا الوسطى، عرف خروج الگول ياسين بونو اللي ما قدرش يكمل المباراة بسبب الاصابة ودخل بلاصتو الدوزيام گول منير المحمدي، وحتى افريقيا الوسطى توعت لهم لعاب وخرج حتى هو.

وكاينة أجواء حماسية فالتيران ديال وجدة فماتش المغرب وأفريقيا الوسطى، وحاضر الجمهور بشكل قوي باش يشجع الأسود، اللي لاعبين قدام رئيس الجامعة الملكية المغربية لكرة القدم فوزي لقجع، والزميل ديالهم براهيم دياز اللي جا خصيصا هو وعائلتو يشجعو المنتخب المغربي فهاد الماتش واخا الاصابة اللي عندو، واللي خلاتو يغيب على ليكيب ناسيونال فهاد التوقف الدولي.