كود سبور//

تعادلو الوداد الرياضي مع مضيفهم النادي الإفريقي التونسي اليوم الاحد، فماتش أميكال بين الفريقين فتيران رادس فتونس.

والماتش الودي اللي عرف حضور رئيس الوداد الرياضي هشام آيت منا، كان فيه الفريق الأحمر متأخر بواحد لزيرو، ماركاه للنادي الإفريقي المدافع الوداد نبيل مرموق بالغلط على راسو فالشوط الأول ملي كان باغي يرجع الكورة للگول عبد العالي المحمدي، ولكن ضربها نيشان لشبكة الوداد، وفالشوط الثاني قدرو الوداديين يرجعو فالنتيجة بهدف ماركاه محمد الرياحي، وسالا الماتش بنتيجة واحد لواحد.

وداخل الماتش بين الوداد الرياضي والنادي الإفريقي ضمن استعدادات الفريقين للموسم المقبل، والوداد بقيادة المدرب الجنوب إفريقي رولاني موكوينا باغيين يستغلو جميع الماتشات الودية باش يخلقو فريق منسجم وقادر ينافس فالموسم الجاي على الألقاب.