أنس العمري – كود///

محكمة التحقيق فـ”إل إيخيدو” بإقليم ألميريا الإسباني، صدرات مذكرة توقيف دولية فحق راجل مشتبه فيه فقتل مرا عندها 35 عام، بعدما تعرضات للطعن فـشارع “لا موهونيرا” نهار 2 أكتوبر اللي فات، واللي كيتعتقد أنه هرب للمغرب مباشرة بعد ارتكاب الجريمة.

الضحية تلقاوها مرمية فـشارع “لافاديرو” بنفس المنطقة، وعليها خمس طعنات، وحدة منهم كانت قاتلة وضربات الأعضاء الحيوية ديالها، وخلاتها تموت فبلاصتها.

وفور ما توصلو بالخبر، حضرو رجال الصحة والحرس المدني والشرطة المحلية، وأكدو الوفاة.

التحقيقات اللي دارها الحرس المدني بينات أن المشتبه فيه، اللي عندو 53 عام، هرب فـنفس النهار عبر ميناء “الجزيرة الخضراء”، وخلا سيارتو تماك. ولقاو فيها سكين يرجح تكون هي أداة الجريمة.

محامي عائلة الضحية، أوسكار تريبيانا، أكد أن كاميرات المراقبة فالميناء صوّرات المشتبه فيه، وتم التعرف عليه وعلى العلاقة اللي كانت بينو وبين الضحية بفضل الشهود والمعطيات اللي لقاوها فالتليفون والحوايج ديالها الشخصية.