وكالات//

قرر فريق تريك سيجارفريدو أنه يوقف الدراج الطالياني أنطونيو تيبيري لمدة 20 يوم بعدما غرماتو المحكمة 4000 أورو حيت قتل مشة ديال وزير السياحة في سان مارينو.

الفريق اعتابر أن الرياضي نتاهم ميثاق الأخلاق لي كيعتامدو عليه، وأكدو أنهم غادين يتبرعو بالصالير ديالو في مدة التوقيف لمؤسسة رعاية الحيوانات وحمايتها وإنقاذها.

الرياضي قال قدام المحكمة أنه شرا بندقية، في الأول تيرا في بلاكة، ومن بعد شاف المشة ونيش عليها وقتلها، واخا مكانتش النية ديالو يقتلها.

وزير السياحة مول المشة معجبوش القرار ديال الغرامة، وبغاه يدخل الحبس يتربا.