كود – كازا ///

قالت مواقع محلية ف اسبانيا، إن عناصر الشرطة الوطنية شدو، مؤخرا، 5 ديال الأشخاص فمحطة مراقبة الحدود البحرية بميناء الجزيرة الخضراء (قادس)، كما تم حجز طوموبيلات ومواطر ديال اللوكس، كلهم مسروقين من دول الاتحاد الأوروبي وكانو غادي يتهربو للمغرب.

وحسب المصادر ذاتها، كتبلغ القيمة السوقية ديال هاد المسروقات حوالي 150 ألف يورو، وكلها من إيطاليا وفرنسا، كما تمت مصادرة مبلغ إجمالي قدره 8680 يورو كان بحوزة أحد المعتقلين، وتم وضع المشتبه بهم تحت تصرف قاضي بمحكمة الخزيرات.

وارتفعات منذ بداية العام الحالي محاولات تهريب الطوموبيلات ديال اللوكس اللي مسروقين في أوروبا للمغرب اللي غالبا كيكون غير محطة مؤقتة في اتجاه باقي الدول الأفريقية اللي كتم فيها عمليات إعادة البيع من طرف شبكات إجرامية متخصصة فهاذ الدومين.