كود سبور//
كيعيشو اتحاد العاصمة الجزائري حالة ماشي طبيعية قبل ساعات قليلة من ماتش الفريق أمام نهضة بركان اليوم الاحد فتيران بركان، ضمن إياب دومي في فينال كأس الكونفدرالية الإفريقية.
وحسب معلومات توصل بها “كود”، كاين انقسام داخل بعثة اتحاد العاصمة اللي گالسين فلوطيل فالسعيدية، بين گروب باغي يلعب الماتش ضد نهضة بركان باش يحافظ على ماء وجه الفريق ويتجنب عقوبات قاصحة عليه وعلى الكورة الجزائرية تقدر توصل حتى للمنع ديالهم من مشاركة الفرق والمنتخبات الجزائرية فالبطولات الإفريقية.
وبين گروب آخر ما باغيش يلعب الماتش وديما فالتيليفون مع الجزائر كياخذ التعليمات قبل من أي خطوة كديرها البعثة، وهاد الگروب داخل بعثة الفريق الجزائري هو اللي كان ورا الاعتراض على توني فريق نهضة بركان فالاجتماع التقني وبالضبط على خريطة المغرب، من خلال المدير الرياضي لاتحاد العاصمة توفيق قريشي اللي ديما فتواصل مع السلطات الجزائرية كياخذ التعليمات واش يلعبو أو ما يلعبوش.