كود سبور//
شدو البوليس فالصبليون 4 الأشخاص متهمين بالتورط فحملة عنصرية ضحيتها البرازيلي فينيسيوس جونيور نجم ريال مدريد، وهذا الشي قبل أيام قليلة من الكلاسيكو ضد البارصا.
وكشفت جريدة “ماركا” الإسبانية، أن البوليس شدو 4 المسؤولين رئيسيين على حملة العنصرية ضد لاعب ريال مدريد فينيسيوس جونيور، فالديربي اللي كان بين الريال والأتلتيكو.
وحسب الجريدة الإسبانية، فالمعتقلين الأربعة، تتراوح أعمارهم بين 24 و26 عام، وناضو حرضو المشجعين ديال أتليتيكو مدريد باش يمشيو للتيران فالديربي اللي تلعب يوم 29 شتنبر الماضي ضد ريال مدريد ويعايرو فينيسيوس بكلمات عنصرية.
وجا اعتقال هاد الأشخاص، بعدما فتحت السلطات الإسبانية تحقيق، بسبب شكاية تقدمت بها رابطة الدوري الإسباني لكرة القدم بانتشار بعض التغريدة العنصرية على مواقع التواصل الاجتماعي ضد فينيسيوس.