كمال لمريني- كود وجدة //

بعدما أعلن الرئيس الفرنسي، “إمانويل ماكرون”، البارح الأربعاء، أن فرنسا غادي تصيفط 3 طيارات للجزائر، اليوم الخميس، باش تعاون في إطفاء النيران اللي شعلات ف الدزاير، رجع أكد اليوم أن جوج طيارات “كنادير” وصلو للتراب الجزائري للمساهمة ف جهود إطفاء النيران اللي شعلات تما.

وكان ماكرون قال ف تغريدة نشرها على صفحته بموقع “تويتر”: “قدام المآسي اللي كاتواجه صحاب فرنسا، فإن التضامن نتاعنا صريح، وباغي نقدم الدعم الكامل”.

وزاد ف نفس التغريدة أنه غادي يتم إرسال جوج طيارات إطفاء “كنادير”، وطيارة ثالثة ديال التوجيه لمنطقة القبايل اللي كلاتها عافية مجهدة هاد ليام.

وفي تغريدة اليوم قال الرئيس ماكرون: ” جوج طيارات (كنادير) اللي رسلاتهم فرنسا لمساندة الشعب الجزائري وصلو.. وغادي يعاونو فـ محاصرة الحرائق الكبيرة اللي شاعلة فـ الجزائر منذ أيام”.