عمر المزين – كود///

عاش حي طريق عين الشقف ففاس، اليوم الأربعاء، على وقع حادث خطير، بعدما تعرّض قائد الملحقة الإدارية “المرجة” لاعتداء عنيف من طرف واحد الجار ديالو، اللي كيخدم حارس بإحدى المؤسسات التعليمية، وذلك فظروف مازال البحث كيكشف عليها.

وحسب المعطيات المتوفرة، لـ”كود”، فإن الاعتداء كان خطير وخلا الضحية يتصاب بإصابات بليغة، الشي اللي فرض نقله على وجه السرعة للمستشفى باش يتلقى العلاجات الضرورية.

المشتبه فيه، حسب المصادر ديال “كود”، ما كانش بوحدو، حيث تبيّن أن ابنه عاونو فارتكاب هاد الأفعال الإجرامية، قبل ما يلوذ بالفرار مباشرة من بعد الواقعة.

وأكدت مصادرنا أن قائد الملحقة الإدارية ديال المرجة تعرّض لكسور على مستوى الأنف والرأس، وحصل على شهادة طبية كتحدّد مدة العجز فـ25 يوم، وهو ما كيبرز خطورة الاعتداء اللي تعرّض له.

وفور علمها بالحادث، دخلات مصالح الأمن الوطنيعلى الخط، وفتحات بحث قضائي تحت إشراف النيابة العامة المختصة، من أجل تحديد جميع الظروف والملابسات المحيطة بهاد الواقعة، وتوقيف جميع المتورطين.