الرئيسية > آراء > قايدة واقفة على مولات الربيع كتقوليها واش كتآمني بالله الى كتآمني بيه راه هو لي غادي يرزقك فين ماكنتي، على هاد الحساب بلاش من داك الصندوق ديال كورونا نردو الفلوس لماليهم ونكلسو نتسناو الله يرزقنا
28/03/2020 16:00 آراء

قايدة واقفة على مولات الربيع كتقوليها واش كتآمني بالله الى كتآمني بيه راه هو لي غادي يرزقك فين ماكنتي، على هاد الحساب بلاش من داك الصندوق ديال كورونا نردو الفلوس لماليهم ونكلسو نتسناو الله يرزقنا

قايدة واقفة على مولات الربيع كتقوليها واش كتآمني بالله الى كتآمني بيه راه هو لي غادي يرزقك فين ماكنتي، على هاد الحساب بلاش من داك الصندوق ديال كورونا نردو الفلوس لماليهم ونكلسو نتسناو الله يرزقنا

محمد سقراط-كود///

هاد الحملة ديال القياد والكاميرات المرافقة ليهم خلاتنا نتعرفو على رجال ونساء السلطة الجداد في البلاد، وكيف مابدات هاد الحملة بفيديوات زوينة كتبين روح التضامن والتآزر والأداب والإحترام والنزاهة في تطبيق القانون، وشفنا فيديوات زوينة بزاف كتخلي الواحد يطمأن ويرتاح أنه في دولة عندها رجالها وعيالاتها وماشي في دويلة تقدر تريب عند أول عطسة فيها كورونا، ولكن للاسف باقي ماكملاتش تلتيام هاد الحملة حتى شفنا قايد كيصرفق في المواطنين قدام الكاميرة( ربي وصى على السترة)، وشفنا قايدة واقفة على بنت وصاحبها ومتسولهم على الكاغيط ديال الزواج هاد السؤال لي مابقاش في السعودية باقي فدماغ القايدة، وحتى الى كانو بالكاغيط وعشرين ولد آش خرجهم فداك الوقت هذا هو السؤال ماشي واش عندك الكاغيط بحال الى حظر التجوال راه كاين غير على لي باقين بلا زواج، أما لي عندو الكاغيط هانية.

شفنا قايدة واقفة على مولات الربيع كتقوليها واش كتآمني بالله الى كتآمني بيه راه هو لي غادي يرزقك فين ماكنتي، على هاد الحساب بلاش من داك الصندوق ديال كورونا نردو الفلوس لماليهم ونكلسو نتسناو الله يرزقنا، بحال هاد الهدرة تقال في أيام الرخى فين كيتكون الحركة دايرة والرزق داخل، دلك الساعة بصح رزقك كيجي حتى لعندك، ولكن هادي راه جائحة عالمية الإقتصادات الكبيرة في العالم وغادي تاكل الدق والملايين غادي يفقدو الوظائف ديالهم ، والموت كتهدد الملايين، أما ديك الهدرة ديال سيري والله غادي يكون بيك كون كانت بصح كاع مايتسبب الله فهاد كورونا لي بسبابها غادا تحرم ديك المرة مسكينة من رزقها.

مزيان يوليو رجال السلطة يوثقوا التدخلات ديالهم بالفيديو باش يكون لكل ذي حق حقه، وفي نفس الوقت نتعرفو عليهم كمغاربة وعلى دورهم في حماية المواطنين، ولكن لي ممفهومش هو هاد عرام ديال المواقع الإخبارية كل قايد أو قايدة بالموقع ديالو، وكان القياد النجوم كتلقى تابعهم كثر من موقع، في الأصل خاص يكون التصوير ديال موالين الوقت وهوما صحاب المادة وهوما لي يحطوها فالأنترنيت ماشي كل قايد والموقع الخاص بيه تابعو، وكاع هاد المواقع عندها خط تحريري واحد هو صور وحط فقط، راه الى بقا غادا الوقت سايبة هاكة قريب يوليو عندها عقود إحتكارية وحقوق البث تبعيهم الداخلية للموقع لي يخلص كثر، وتولي تدخلات القياد تدوز حصريا على بي إن سبور.

موضوعات أخرى