قرار بتجميد حساب لبيكيه بسباب التحقيق فصفقة سعودية لاستضافة السوبر الإسباني
عفراء علوي محمدي- كود//
أوديو داير حالة على مواقع التواصل الاجتماعي، فيه محادثة صوتية مزعومة بين الصحافي المعتقل سليمان الريسوني، والمشتكي بيه محمد آدم، اللي دعاه على هتك العرض بالعنف والاحتجاز، وهي التهم اللي تدان بيها الريسوني ابتدائيا ب5 سنين ديال الحبس وتعويض 10 مليون سنتيم.
https://m.facebook.com/story.php?story_fbid=10159755679668521&id=757378520
فالأوديو المنتشر دار بين الريسوني وآدم حوار قصير، كيبان فيه ان الريسوني كيحاول يهدأ من روع آدم، ويقول ليه أنه “وقع سوء تفاهم”، وماكاين لاش “يدراماتيزي الأمور”، فالوقت اللي كيسولو آدم “علاش غدي نكَلسو أنا وياك؟” وكيقوليه أنه “حساب ليه قالها لمراتو خلود”، قبل ما يجاوبو الريسوني “آ عيقتي آ صاحبي.. عيطت ليك قلت ليك باش نكَلسو انا وياك، ماقلت ليك لا خلود لا والو”.
وزاد الريسوني، فالأوديو المنسوب ليه، كيقول لآدم “مابغيتيش تكون صاحبي؟ إيوا صافي ضحك.. انا صاحبك وديما غتلقاني فجنبك فأي حاجة احتاجيتيني…”، وهو يجاوبو آدم “صاحبك حاجة وداكشي اللي درتي حاجة…”
وفوقت تسجيل الاوديو، كان آدم غادي عند خلود، مرات الريسوني، باش يكمل معاها الروبرتاج اللي كانو دايرين، وفاش قالها آدم للريسوني، اكد عليه هذ الأخير باش مايقول ليها والو: “عيطات عليك؟
دونك انا ماتلاقيتيني ماتلاقيتك… عندك باش تمشي عندها؟”.
فتصريحو ل”كود”، قال المشتكي بالريسوني محمد آدم ان هذ الاوديو صحيح، وكان من بين الأدلة اللي عطاها للمحكمة والبوليس، لكن اكد انه كيجهل مصدر تسريبو، لأنه ماشي هو اللي خرجو للعموم.
وعرض آدم هذ التسجيل على قاضي التحقيق كيف كشف ل”كود”، بالإضافة لشي محادثات، والريسوني تشبت بأنه ماشي هو اللي فالتسجيل الصوتي، وفاش طلب قاضي التحقيق إجراء الخبرة الصوتية، رفض يديرها، “لو كان متاكد من براءتو كان يدير الخبرة الصوتية على الأوديو، انا درتها وتبين انه فعلا صوتي، وهو رفض”.
ووضح آدم ظروف تسجيلو للاوديو بالقول: “هذاك التسجيل ماشي مكالمة هاتفية، هو تسجيل درتو من بعد الواقعة مباشرة، واخا خرجت فحالة غير عادية، كان صونا عليا الريسوني مرات كثيرة، وضطريت نجاوبو ونتسناه يجي عندي لراس الدرب باش ندير هذ التسجيل، اللي كان هو الدليل الوحيد اللي عندي من الواقعة، بالإضافة للمحادثات”.
واكد انه من خلال التسجيل، كيبان من صوتو انه مصدوم وخايف وستريسي، “شافني فحالة غير طبيعية، وبغا يتأكد ديك الحالة شنو ممكن يكون من وراها، وشنو الخطوات اللي ممكن ندير، والرياكسيون ديالي بعدها، هذشي علاش جا يطمن”، حسب آدم.
وكشف آدم أن هذ الاوديو هو الوحيد اللي كاين عندو، بالإضافة لمحادثات على ميسنجير، فيها ميساجات كيطلب فيهم سليمان الريسوني آدم باش يجي عندو للدار.
وتحدى آدم الناس اللي شككو فمصداقية التسجيل، مادام ماكيتيقوش فخبرة المؤسسات المغربية، يسيفطوه لمختبرات خارج المغرب، ويشوفو واش التسجيل مفبرك ولا صحيح.
اما سليمان الريسوني فرد على رفض الخبرة على الادويو وعدم التعليق عليه، وقال: أولا لأنه لم يسبق أن عرض عليه اي تسجيل صوتي ليجري خبرة صوتية عليه. ثانيا لان ما عرض عليه هو تفريغ لتسجيل لا يتضمن أي عنصر ادانة. وثالثا لانه لم يتم أخباره ولا اخبار دفاعه بالخبرة. ورابعا لان الخبرة تتم في غياب دفاعه ومايمكنش يقوم باي إجراء فغياب دفاعه.
وقال مصدر مقرب من الريسوني لـ”كود” انهم ماغاديش ينقاشو واش التسجيل مفبرك أو صحيح لكنه لا يوجد به كلمة تؤكد أن هناك اعتداء جنسي او تحرش، واضاف: ثانيا نحن لن برئ احدا ولن ندين احد نطالب بالمحاكمة العادلة وأن يتمتع الصحفي الريسوني بسراح المؤقت وسليمان قاد بشغالو وقاد يدافع على نفسه فقط يعيطوه فرصة ويرفع المخزن يدو على الملف وأن يصبح ملفا عاديا يحتكم للقانون وليس للتعليمات.