وكالات//

ميغان ماركل والأمير هاري جاوبو على الشائعات اللي كتقول بأنهم عايشين كل واحد بوحدو، وهادشي كان من خلال الحضور ديالهم فحفلة بيونسي “كاوبوي كارتر”.

تشدو فتصاور وهما كيستمتعو فالحفل، وحتى فالموقع الرسمي ديال جولة بيونسي تنشرو صور ليهم وهما متعانقين، وكاين حتى فيديو كيبان فيه الثنائي وهما كيتفرجو فبيونسي كتعزف وكتغني.

هاري كان كيرقص مع الموسيقى، وميغان كانت كتغني “تكساس هولدم”.

هاد الحضور ديالهوم ماشي الأول، بحيث كانو حتى فحفلة “رينيسانس” ديال 2023 اللي مشاو ليها باش يحتافلو بعيد ميلاد الأم ديال ميغان اللي وصلات لـ67 عام.

العلاقة بين عائلة هاري وبيونسي زوينة، حيث بيونسي سبق وعبرات على إعجابها بميغان من بعد اللقاء ديالها مع أوبرا، اللي قالت فيه ميغان أنها تعرضات للعنصرية وسط العائلة المالكة.

وهاد الظهور ديالهم فالحفل جا بعدما الناس بداو كيهدرو بأن العلاقة بينهم ولات باردة، خصوصاً أن هاري مشا لأوكرانيا فشهر اللي فات، وميغان مشات لعرض فبرودواي. لكن، الحضور ديالهوم مع بعضهم كيبيّن بأن العلاقة ديالهوم مازال قوية.