سعيد الشاوي – كود//

فيديو خطير تيدور هاد الأيام في واتساب وفيسبوك ، ديال واحد القاضية متقاعدة سبق ليها دار خرجة إعلامية في شي قنوات إعلامية، على واحد الحكم مشبوه تاع الشفعة على عقار مساحتو 150 هكتار، كاين في برشيد، قالت بلي بغاو يديوه ليها تحت ذريعة ديك الكلمة اللي ولات سخرية، وسبق للكوميدي جاد المالح دارها في آخر السكيتشات تاعو، وهي اللي تتعلق بـ”من الفوق”.

زعما اللي بغا يطحن شي واحد ولا يغمق عليه يقوليه هادي جايا من الفوق، وخا الفوق اللي تنعرفوه، ميمكنش يسمح بخرق القانون والاعتداء على الناس، بالعكس، شفنا شحال من زلزال تعمل في الإدارات العمومية بسبب التقصير أو عدم الاتهام بقضايا الناس وغيرها.

دابا هاد القضية السابقة تتناشد الملك باش نصفها وينصف العائلة تاعها، حيث لاحظات أن الطريقة باش غادي الملف لا تبشر بخير، وأن القانون تم الدوس عليه.

خاص يتفتح تحقيق في هاد الخروقات، ويشوفو واش فعلا الكلام تاع هاد السيدة المتظلمة، صحيح، واش فعلا بغاو يديو ليها العقار اللي تيسوى أكثر من 60 مليار، بعد ما باعو باها والشركا تاعو، واش فعلا هاد الشفعة اللي انصبات على عقار من الأراضي المسترجعة وقع فيه التخلي من الدولة مقابل 30 مليون سنتيم، غاتدوز رغم أن جميع قرارات محكمة النقض تتقول بلي لا شفعة على عقود التخلي، حيث إلى بغات تكون شي شفعة خاص تتعمل ملي شرا هاد الضحية العقار من عند المعمر في 1969، ودفع فيه فلوسو، ماشي حتى خداتوا الدولة وتبين ليها أن ماليه عندهم وثائق باش تيملكوه وعندهم حيازة وتيحرثو، وعطاتهم شهادة الاستغلال قبل ما تسوي معاهم الوضعية بالتخلي، اللي معمرو ماكان كيتوصف بعقد بيع حسب القضاء المغربي.

وهادشي قضى سنوات ديال الخدمة تاع اللجنة المتعددة القطاعات. كود سبق ليها نشرات شي مقالات على هاد القضية الغريبة والعجيبة، وتفاجآت اليوم بخروج هاد السيدة من جديد في شريط تتحكي فيه نفس القضة لكن هاد المرة تتذكر أسماء، من ضمنها داك المعروف بمول البارود واللي تايدعي أنه صاحب الناس اللي لفوق وصاحب كاع المسؤولين، وهو اللي من وراء هاد الفبركة تاع الشفعة واستعمل شي سمسار، وجابو واحد ماهوا وريث ما عندو صفة ما مالوا عندو زمام متروك ماشي سند تاع الملكية، حيث الملكية تتطلب الحيازة بالحرث والاستغلال، سبق للمحكمة في 1996 رفضاتو، حيت معمرو مدار شي تعرض ملي كانت الأرض تتحفظ، قبل استئناف الحكم من بعد 27 سنة، وصدور حكم محكمة الاستئناف ديال سطات مخالف للقانون كيف تتقول هاد السيدة المتظلمة.

دابا واش كاين شي قانون فالبلاد ولا اللي حكر على شي حد يدي ليه تاعو، واش فعلا القضاء ولا في جيوب شي وحدين تيعملوا ما بغاو. النداء تاع هاد المراء المظلومة خاص يوصل، حيت إلى محكمة النقض مطبقاتش القانون، غاتشرد هيا والعائلة تاعها، حيت باعو العقار لشي شركة كيف قالت والرشكة حفظات العقار باسمها.