كود –  وكالات//

قالو قادة “جمهورية القبايل” أنهم مغاديش يتفاكو باش يعلنو قيام جمهوريتهم، وخا قرار السلطات الفرنسية لي منعات تنظيم تجمعهم فالفضاءات العمومية بدعوى اعتبارات أمنية.

وحسب المعطيات، القيادات قررات اللجوء للمحكمة الإدارية الفرنسية للطعن فهاد القرار، وكتعتقد أن المبررات الأمنية ما كتعكسش الحقيقة، وكترجح أنه كاين ضغط من الجيش الجزائري .

وفنفس السياق، قادة القبايل علنوا أنهم غادي يبثو إعلان الجمهورية رسميًا اليوم الأحد 14 دجنبر مع 6 دالعشية بتوقيت فرنسا من خلال الإعلام والشبكات الاجتماعية، وفانتظار نتائج المحكمة. الخطوة هادي كتهدف حسبهم للدفاع على “الحق فالتقرير المصير” والقضية القبايلية على الساحة الدولية، وغايتفاداو أي توتر أمني.

هاد التطورات جاية وسط صراع مستمر بين حركة تقرير مصير القبايل (MAK) والسلطات الجزائرية، اللي كتمنع  الحركة وكتعتبرها انفصالية، أما القيادة  وعلى رأسها  فرحات مهني، كيمارسو  أنشطتهم السياسية والإعلامية بشكل عادي  من فرنسا.