كود – مراكش //

أكدات وزارة السياحة والصناعات التقليدية والاقتصاد الاجتماعي والتضامني بلي قطاع السياحة فالمغرب كيعرف نمو قوي، وقدر يوفر  894 ألف خدمة مباشرة ف 2025 ، هاد  الرقم حتى هو فات الهدف لي كان تحط فـخارطة الطريق ديال 2023-2026، و لي كانت كتهدف تخلق 80 ألف خدمة زايدة حتى لـ2026.

نفس المعطيات خرجات بها المندوبية السامية للتخطيط، ولي قالتو ان  هاد الشي كيعني بلي تزادو 92 ألف خدمة فثلاث سنين، اما عدد السياح لي زارو المغرب فـ2025 تقريبا 20 مليون سائح، وخا الهدف لي كان محدد فخارطة الطريق لعام 2026 هو غير 17.5 مليون سائح ،وفنفس الوقت، وصلات مداخيل السفر لـ138 مليار درهم، يعني بزيادة 18 مليار درهم على الهدف لي كان متحدد لعام 2026،

الفنادق الفاخرة كتلغب دور فهاد الارقام الكبيرة، ومن بين المشاريع الفندقية لي طرق لها موقع  premiumtravelnews مشروع رئيس الحكومة القطري السابق حمد بن جاسم آل ثاني، لي معروف فالعالم المالي بالاختصار ديال HBJ،  ولي داير مشروع كبير وسري فـواحة النخيل فـ مراكش ، هاد المشروع بدات المراحل اللولة ديالو فـ 2023، وغادي يكون فيه فندق كلاص  بخمس نجوم فيه تقريباً 101 شومبر وزيد عليهم 29 فيلا خاصة من مستوى الفخامة العالية ،البلاصة لي غادي يتبنى فيها المشروع كتعتبر من أكثر المناطق المطلوبة فـالبالمري، والهدف هو يجمع ما بين الضيافة الراقية والسكن الفاخر لناس عندهم ثروات كبيرة من بزاف ديال الدول.

المشروع كيتسير من شركة عائلية سميتها فور هولدينغ، و مع هاد الشركة كاين تحالف ديال شركاء تقنيين وماليين عندهم تجربة فهاد النوع ديال المشاريع ،التصميم المعماري دارو المهندس المغربي جواد البصري، أما الأشغال ديال البناء غادي تقوم بها مجموعة رواندي للإنشاءات ، وحتى التسيير ديال المشروع كاينة شركة دولية معروفة فهاد المجال سميتها غليدز، لي متخصصة فمواكبة المشاريع العقارية الكبيرة والمعقدة.

هاد الاستثمار كيدخل ضمن استراتيجية واسعة  ديال HBJ فمجال الفنادق الفاخرة فالعالم ، حيت سبق ليه استثمر ففنادق وعقارات معروفة فمدن عالمية بحال لندن وباريس ،دخول استثمار كبير بحال هادا لواحة النخيل كيبين بلي سوق السياحة الراقية فالمغرب كيكبر بزاف، ومراكش ولات كتجبد رؤوس أموال من الخليج وأوروبا، وولات تدريجياً من أهم الوجهات الفندقية الفاخرة فشمال إفريقيا ، وحتى إلا مازال ما تعلنش التاريخ الدقيق لافتتاح المشروع ولا شكون غادي يسير الفندق، ولكن  التحضيرات والدراسات كيبانو بلي المنطقة غادي تعرف تطوير كبير فالسياحة الراقية.