كود سبور//

واصل اللاعب المغربي الأصل والاسباني الجنسية لامين يامال، التألق مع المنتخب الاسباني فكاس أوروبا “ألمانيا 2024”، وساهم فتأهلهم للفينال، والضحية كانت هاد المرة هي فرنسا بنجومها وعلى رأسهم كيليان مبابي.

وسالا الماتش بين منتخب اسبانيا والمنتخب الفرنسي، بنتيجة 2 لواحد لمصلحة لامين يامال وصحابو، وكانو الفرنسيين هما الاولين اللي ماركاو بهدف ديال راندال كولو مواني فالدقيقة 9، ومن ورها ماركاو اسبانيا التعادل بواسطة  لامين يامال بهدف واعر فالدقيقة 21، وزادو إسبانيا الهدف الثاني عن طريق داني أولمو فالدقيقة 25، وبقات النتيجة كما هي حتى سالا الماتش.

وصبح لامين يامال فعمر 16 عام و362 يوم، هو اصغر لاعب كايلعب دومي فينال كاس اوروبا، وكايماركي فيه، وساهم بهذا النيفو الكبير فتأهل منتخب اسبانيا لفينال البطولة، أما فرنسا بقيادة كيليان مبابي تقصات من الدومي فينال وغاتمشي تلعب ماتش الترتيب على المركز الثالث، في انتظار معرفة شكون غايتأهل للفينال من الدومي فينال الثاني بين النگليز وهولندا وشكون اللي غايلعب المركز الثالث.