كود ـ بئر الجديد//

علمات “كود” أن مفوضية الشرطة فمدينة البئر الجديد، بقيادة رئيسها هشام العوماري، قدرات تدير عملية أمنية دقيقة طيحات مجرم خطير يشتبه تورطو ف قضايا ديال السرقة والاعتداء، فإطار المجهودات اللي دايراها المصالح الأمنية فالمدينة لمحاربة الجريمة بكل أنواعها وتعزيز الإحساس بالأمان عند الساكنة.

المعطيات اللي توصلات بيها “كود”، كا تقول بللي هاد العملية جات من بعد تحريات دقيقة وتتبع ميداني دارتو عناصر الأمن تحت الإشراف المباشر ديال رئيس المفوضية، بحيث تم رصد تحركات المشتبه فيه ومحاصرتو فالتوقيت المناسب، وتم إيقافو باحترافية كبيرة وبدون أي إصابات.

العملية اللي توصفت بأنها ناجحة، خلفات ارتياح كبير عند الساكنة ديال البئر الجديد، اللي شكرو المجهودات المتواصلة ديال رجال ونساء الأمن فالمدينة، وأكدو على الانضباط واليقظة اللي ولات علامة مميزة فخدمة عناصر المفوضية.

وهاد التدخل كيعكس مرة أخرى الجاهزية والاستباقية ديال الأمنيين فالبئر الجديد، فإطار الاستراتيجية الوطنية اللي كتنفذها المديرية العامة للأمن الوطني، واللي الهدف منها تعزيز الأمن والاستقرار وحماية المواطنين وممتلكاتهم فكل ربوع المملكة.