محمد سقراط-كود///

مملكة الراهب هو مصطلح كيتطلق على الدول المتوحدة لي سادة على راسها ومعندها حتى شي إتصال مع العالم الخارجي وبشكل إختياري، يعني ماشي هوما معزولين بحال شي قبيلة بدائية في الأمازون أو فشي جزيرة ممعروفاش، حيت الإسم تطلق على واحد الحقبة من تاريخ كوريا أيام مملكة جوسون كانو قررو يسدو عليهم اختياريا ويقطعو أي تواصل ليهم مع العالم، وحاليا كيتطلق هاد المصطلح حتى على كوريا الجنوبية، وإلى بقات الحكومة المغربية غادا بهاد القرارات غادي يولي يتطلق حتى على المغرب، نظرا لهاد الإغلاق لي كان غير مبرر ومعندو حتى منطق بينما العالم كلو حال حنا سادين كأن كورونا كتستهدفنا شخصيا من دون العالم، وحتى ملي الحكومة حلات البلاد دارو شروط شبه تعجيزية ومبالغ فيها للي بغا يدخل يرجع بحالو أو كسائح.

في نفس النهار لي قررات الدانمارك أنها ترفع جميع القيود ديال كورونا وعلنات أن أوميكرون ماكيشكل حتى خطر مادام أن الملقحين كثار في البلاد، ولي بغا يدخل لللبلاد يكون ملقح ومرحبا بيه، حنا من بعد مافرحنا بفتح الحدود كنلقاو الحكومة دارت ألف شرط وشرط، خاص تكون ملقح بتلاتة دالجرعات وتكون داير تيست بي سي آر، وملي توصل يدار ليك أنتيجينيك وملي تمشي لوطيل يتزادك واحد آخر، أواه شنو لي كاين في هاد البلاد بالسلامة والعافية يستاهل هاد التعنكيش بينما دول أخرى أفضل منا في مجال السياحة ومادايراش هاد الشروط كلها، واش هادي ماشي طريقة باش نجريو على السياح عوض نستقبلوهم بأوميكرون ديالهم، لأنه ماشي بداك الدرجة الكبيرة من الخطورة على الملقحين.

علاش مصير البلاد يبقى مرهون بالمزاج ديال هادوك لي مابغاوش يلقحوا، والحكومة تنوض تعاقب أغلبية الشعب بهاد القرارات لي كتحد من حريتو وكتهلك إقتصاد البلاد على ود واحد الأقلية مابغاتش تلقح والحكومة فشلات أنها تقنعها بالعكس ، الموشكيل هو كاين بزاف دارو اللولة والتانية جاو حتى للتالتة وخافو بسباب الإشاعات والهدرة الكثيرة لي وزارة الصحة وبسباب ضعف تواصلها ماقدراتش ترد عليها وتقنع الناس يكملو شنو بداو، فاش بدات الحملة ديال التلقيح كان الهدف حسب الحكومة هو نسبة عالية من الملقحين ونسبقو دول أخرى ونحلو الحدود قبل منهم ونستقبلوا سياحنا وسياحهم، ولكن وبقدرة قادر وقع العكس مشينا مزيان في التلقيح ولكن سدينا على راسنا وهاحنا ملقحين والبلاد سادة، وحتى ملي تفتحات دارو شروط بحال الى جنة عدن كاينة بين بن حمد وولاد سعيد.