سهام البارودي- كود ////
—
الگور لي سابقينا بسنوات ضوئية ديال المعرفة بالحياة كايگولو شي مرات شي هضرة مفيدة فحال واحد المثل معروف don’t shit where you eat! بالعربية تاعرابت ” ماتخراش فالبلاصة لي كاتقصي فيها” و المعنى المجازي ديال هاد المثل الحكيم و الذكي! هوا أي بلاصة كاتاكل فيها طرف د الخبز خليها بلاصة طرف د الخبز و كفى و خليها نقية ! ماتخلطش فيها بين ما هوا شخصي و ما هوا عملي !
ولكن حيت الإنسان كائن راسو قاصح ماكايسمعش كاتلقاه كايموت على التخلاط ! مرونها شي مع شي فين كايخرا فين كاياكل فين كاينيك فين كايتزلل حتى كايجيب الربحة الكبيرة ! و هادشي ماشي غي عندنا راه كاين فالعالم كامل فحال القضية الشهيرة ديال كلينتون و السطاجيرة مونيكا لوينسكي ! حتى عند الگور كايوقع هادشي غي هوا الگور دايرين ترسانة قانونية قوية كاتحمي أي واحد و لا وحدة تعرض للاستغلال فالخدمة و كان ضحية شي تخليطة ! و كاتعاقب أي ولد القحبة حاول يتستاغل المنصب ديالو باش يفرغ المكبوتات ديالو فالعيالات لي خدامين معاه!
و لكن كاتبقا هاد القضية ديال العلاقات الجنسية فالخدمة مسألة كومبليكي بزاف ! و متداخلة ! و مرونة مايمكنش غي تجي و تبدا تشير فالأحكام المسبقة “آه باينة اغتاصبها” “آه باينة نصبات عليه” ! مايمكنش خصوصا و أنه فقضية سليم الشيخ كلينتون و سلوى لوينسكي لي كاتاهمو بالاغتصاب مازال بزاف ديال الحوايج مبهمة و الأسئلة لي ماعندهاش جواب هاد الساعة.
علاش ساينات سلوى من 2014 تال دابا عاد فرگعاتالرمانة؟
من 2014 و هي محتافطة بالميساجات و التسجيلات تال 2017 ؟
كون السيد تدخل ليها و ولات مذيعة واش كانت غادير هاد الهندقة كاملة و غاتقول عليه مغتصب و استغلالي و وحش كيما وصفاتو؟
واش هادشي لي كادير فيه دابا حيت تغتاصبات ؟ و باغا تاخد حقها و حق البنات لي كايتستغلو فدوزام (حسب اقوالها) و لا كادير هادشي حيت حسات براسها تشمتات و صدقات لا ديدي لا الفانيدي ؟
أسئلة بزاف خاصها توضيح من طرف السيدة و من طرف سليم الشيخ كلينتون تاهوا باعتبار القضية قضية رأي عام ماشي قضية شخصية حيت السيد راه مدير ديال قناة عمومية!
علاش سليم كلينتون ضرب الطم فاش هضرات ليه على الاغتصاب فداك التسجيل لي كلشي سمعو فالتيليفون؟ ماقالش ليها آ بنت الناس راه ماكان لا غتصاب لا والو راه كانت علاقة رضائية؟
واش فاش جات عندو سلوى لوينسكي تشكي عليه فالأول واعدها يحل ليها المشكل لا نعسات معاه؟ فهمها بلي ضروري النفط مقابل الغذاء؟
أسئلة بسيطة ضروري الواحد يطرحها على راسو قبل مايوقف فصف الشيخ كلينتون و لا فصف لوينسكي حيت لحد الآن القضية مبهمة و الميساجات و التسجيلات ماكايعطيوش صورة كافية على شنو وقع.
حنا عارفين بلي كاين بزاف ديال الرجال كايستاغلو المناصب ديالهم و السلطة باش ينيكو العيالات لي خدامين معاهم و كايمارسو عليهم عذاب نفسي باش يرضخو خصوصا لا عرفوهم ماعندهمش البديل ! و عارفين كذلك بلي كاينين بزاف ديال العيالات عندهم استعداد و قابلية ينعسو مع ابليس لاكان غايوصلهم لداكشي لي باغين ( منصب، ترقية؛ انتقال، تزكية للانتخابات …) و هوما لي كاياخدو المبادرة و كايزيرو على بزازلهم مزيان و كايعريو على اللاص و كايرشو شوية د الريحة و يدخلو يتحلونو على الباطرون فالبيرو ….
كاين رجال استغلاليين
و كاين عيالات قحاب
و كيما كاينين علاقات رضائية بين جوج خدامين مع بعضياتهم و باغين يكونو فعلاقة فخاطرهم !
داكشي علاش مايمكنش غي تجي و تهضر فشي قضية فحال هادي ديال سليم الشيخ و سلوى بلا ماتكون شاد فيديك شي ضوسي صحيح و فاهم القصة من طاق طاق تال السلاموعاليكم!