الرئيسية > آراء > في فكر عبد الرزاق حمد الله.. بين هشاشة التفكير وصلابة العاطفة الضعيفة
13/09/2019 11:00 آراء

في فكر عبد الرزاق حمد الله.. بين هشاشة التفكير وصلابة العاطفة الضعيفة

في فكر عبد الرزاق حمد الله.. بين هشاشة التفكير وصلابة العاطفة الضعيفة

مصطفى الشاذلي كود ///

عبد الرزاق حمد الله نجم فالملاعب السعودية بكل تأكيد، وحقق أرقام قياسية بكل تأكيد، ولكنه ليس بلاعب عالمي وأحسن هداف عالمي كيما جا فارقام منشورة….والأكيد أن كل واحد كيفهم فكورة بلا ميلعبها، كان غيدير ردة فعل بلهندة الضاحكة،وماذا نملك غير الضحك لتعامل مع هذا الموقف.

طبعا، التفسيرات والتأويلات والانتقادات لبلهندة بدات من أول دقيقة من طرف أنصار حمد الله ومشجعي النادي ديالو النصر السعودي، اللي اعتبروه تهكم على حمد الله، وانطلقت حملة ديال التشويه والسب والشتم ضد يونس بلهندة، وطبعا دخلو أراء الزماكرية الحكارة وماجاوره من تعبيرات غاضبة تعودنا عليها هاد 10 سنوات الأخيرة.

يقدر يكون بلهندة برهوش وكيحك رلى إنسان بحال حمد الله كيبان ضعيف فشخصيتو ويميل للشكوى والبكاء، يقدر يكون بلهندة باسل وضاصر ( وهذا صحيح) ولكن تا واحد ما يقدر يجادل فأن بلهندة ركيزة أساسية ديال المنتخب خلال 9 سنوات الأخيرة، بأداء ثابت وقتالية فالملعب عكس بزاف د اللعابة اللي دازو.

بلهندة عرق التوني ونشفو، وجا من منتخب أقل من 20 سنة الفرنسي وكان بكل تأكيد غادي يلتحق بالمنتخب الفرنسي ف 2011 العام اللي كان فيه بطل مع مونبوليي وأحسن ممرر ونجم النجوم مع أوليفيي جيرو، يمكن كون ختار فرنسا كون عندو مسار آخر، ولكن هادشي مكيبغيوش يوقفو عندو المغاربة لأنهم ربما تبناو خطاب المظلومية.

كون كان حمد الله أحسن مهاجم فالعالم كون راه كيلعب فريال مدريد، ونهار يطرا ليه موشكيل معا بلهندة الكورة غتوقف وغيميو عليه العار يجي يلعب، الحالات اللي طرات لزيدان ومارادونا وأساطير، ماشي السي حمد الله مول السيرو سبو خضر.

ثم علاش غادي دير فيديو فيه موسيقى ديال فيلم هواجس منتصف الليل ديال الخلعة على ود حركة ديال الضحك؟ لهاد الدرجة السي حمد الله رطب وهش وناعم، ولهاد الدرجة مقدرتيش ترد فالميدان وفضلتي تهرب وتخلي مجموعة فيه 22 لعاب متفاهمتي معا تا واحد فيهم؟

نفرضو أن بلهندة هو شرير المجموعة، والآخرين مالهوم؟ نفرضو كاين تكتل ضدك؟ علاش متبينش وتجاوب بالكورة خصوصا أن عندك حظوظ كبيرة باش تكون المهاجم الأساسي؟ واش كانو مغيباصيوش ليك كورة قدام 34 مليون كتفرج؟

حمد الله بهاد البكائيات من الأحسن ليه ولينا يعطينا بالتيساع، بغينا ناس ” أشرار بحال بلهندة ” ولكن يكونو كيتقاتلو وعندهوم مورال قاصح.

موضوعات أخرى

18/09/2019 17:00

إلى تدارت انتخابات فالمغرب بحال لي فتونس ويشارك فيها بنكيران لا منتمي لا شك أنه غادي يكتاسح حيت المغاربة طلعو ليهم الأحزاب فراسهم والسياسي الوحيد لي كان عليه إجماع عندهم راه شافوا كاملين كيفاش تخلى عليه حزبو من أجل السلطة