محمد سقراط-كود///

في جنوب شرق آسيا حاليا كاين حراك إجتماعي كبير على شكل الربيع العربي غير هو أكثر فاعلية وأقل عنفا وواضح المطالب وخالي من الإسلام السياسي، وقود وأبطال هاد الربيع الآسيوي هم الجيل زيد، هاد الجيل لي كيضحكوا عليه البومرز الخوافة  من كل تغيير في المغرب وكيسميوه جيل تيك توك وجيل طوطو، راه هوما لي دايرين حراك لتغيير حكومات ومحاربة الفساد في دول عندها تاريخ كبير في قمع الحركات الاحتجاجية، أندونيسيا راه شدات الحزب الشيوعي لي كان ثالت اكبر حزب شيوعي في العالم وأبادته عن بكرة أبيه غير في أشهر معدودات في أواخر الستينات، أيام حكم سوهارتو أب التحرير ولكن لي قام بالواجب هو الجنرال سوكارنو، تقريبا مليون شخص باتوا ماصبحوا، داكشي ديال سنوات الرصاص دالمغرب كيبان هنا بحال الى كتقارن رسومات انسان الكهف مع شنو رسم مايكل انجلو في سقف كنيسة سيستينا، وآخر احداث عرفها البلد كانت في 98 ناضوا الطلبة وثاروا على سوكارنو شخصيا بعد تلاتين عام ديال الحكم ونهضة اقتصادية ماستافدات منها الطبقات الهشة والوا.

هاد الحراك بداوه الطلبة في بانغلاديش العام الفايت ضد حصص الكوطا في توزيع الوظائف الحكومية على أبناء المقاتلين في حرب التحرير عوض اعتبار الكفائة كمعيار، طبعا بعد التدخل العنيف للبوليس كبرات الاحتجاحات حتى وصلات للمطالبة بإقالة الحكومة وهروب الرئيسة الشيخة حسنية في هيليكوبتر فكراتنا في مشهد الهروب من سايغون في هيليكوبتر من سطح السفارة الامريكية وبنادم معلق فيها، من بعد امتدت هاد الاحتجاجات لسيريلانكا بسبب سياسات التقشف والفساد المالي والسياسي، ودازت للفيليپين، وهادشي ساهم تيك توك في النشر ديالو عند جيل زيد، تحت شعار الى داروها في بنغلاديش حتى في سيريلانكا نقدرو نديروها، داكشي ديال” يس وي كان”.

في اندونيسيا خرجوا ضد الامتيازات الممنوحة للبرلمانيين وتعويضات التنقل والسكن والرفاهية لي كيعيشوا فيها البرلمانيين الفاسدين، وخصوصا ولادهم لي فرشوا واليديهم في انستغرام وتيك توك وكيتسماو ” نيپو بايبي”، ولاد الفشوش بالدارجة، هاد نيپو بايبي منشوراتهم كلها تباهي بالفلوس والمشتريات والرفاهية لي كيعيشوا فيها بفضل مناصب واليديهم، في الوقت لي اغلب شباب البلاد سواء قاريين أو لا، خدامين كيليڤريو في گراب “گلوڤو ديالهم”، هاد الاحتجاجات كانت واخدة راية جمهورية القراصنة من الأنمي ديال وان پيس هي الشعار ديالها، ولي خلى شباب من العالم يتضامن معاهم ويتعاطف وينشر رسالتهم في مواقع التواصل، موجات كبيرة ديال الشباب كتخرج لسوق الشغل كتشد صاليرات كتخليها عايشة فقط باش تاكل وتخرى وتجي للخدمة في الصباح، هادشي كانوا كيقبلوه البومرز وهوما فرحانين، واي واحد طالب بأكثر من ياكل ويخرى كيسميوه شبع خبز وخاصوا العصى، هادشي حتى في المغرب، وطبعا في سيمانة من الاحتجاجات وقفوا هاد القانون ديال تعويضات البرلمانيين وحققوا مطالب سياسية واجتماعية ليست قدر المبتغى ، ولكن خلاها عزوز فاش كتشير على العدو ومتجيبهاش فيه راه على الأقل كتفكروا انك كاين وخاصوا يجمع راسوا ويرد البال.

حاليا الحراك وصل لدولة نيپال وتقريبا نفس الأسباب الفساد المالي والسياسي،  والمستقبل الأسود لي كيتسنى الجيل زيد في سوق الشغل ونمط العيش وقمع الحريات، وطبعا منشورات النيپو بايبي لي كيغديو هاد الشعور عند جيل واخا قرى حتى طاب ماغاديش يلقى الخدمة لي باغي ويعيش الحياة بلا رقابة وتدخل البومرز وجيل إكس، وكعادة الأنظمة الوحشية الفحشية المعذبة المگملة ناضوا سدوا جميع مواقع التواصل باش يمنعوا البراهش انهم يتواصلوا بيناتهم وينظموا الإحتجاجات، ساعة ناض جيل زيد وقصد البرلمان حرقوه،  ومبنى الحكومة ودخلوا على الوزراء لديورهم سلخوهم وحرقوهم، تدخل البوليس كان وحشي وماتوا تقريبا عشرين واحد، ولكن هادشي كي العادة زاد شعل الاحتجاحات لي باقا متوقفاتش ليومنا هذا.

كنظن أن الدولة المغربية خاصها تقرى هاد الاحداث وتفهمها وتحللها مزيان، لأن الواقع ديالنا حاليا مابعيدش بزاف على دوك المناطق، عندنا تنمية في شريط ساحلي من طنجة لكازا وفي الصحرا، باقي المغرب منسي مهمش ومهمل علما ان فيه مدن كبار بحال فاس مكناس تارودانت الراشيدية وجدة الناظور والعديد من المدن الأخرى، اغلب المغرب كالس كيتفرج في قنت واحد من البلاد كيتطور ويتقدم وهوما منسيين، جيل زيد معندو حتى حاجة فين يخرج الطاقة والابداع ديالو، الحريات في المغرب تراجعات بشكل كبير وكاين ناس كتحاكم بقوانين ديال محاكم التفتيش بحال ابتسام لشگر، القانون كيجرم كاع وسائل الترفيه المتفق عليها كونيا في الدول لي كتحتارم شعبها مخلي الجوامع فقط، هاد جيل طوطو وجيل تيك توك حاگرينو بزاف للأسف راه تقدر تكون النوضة ديالو قود من ديالنا وديال الأجيال لي سبقونا، حنا راه ولاد البومرز زرعوا فينا الخوف من المقدس مع البزولة هادوا مكيقدسوا حتى حاجة.