محمد سقراط-كود///
في بلاد التعبير فيها عن الحب بممارسة الجنس خارج الزواج يعتبر جريمة يعاقب عليها القانون بالحبس، وفي بلاد علاقة حب بين جوج دراري أو جوج بنات أو بين دري وبنت وشيمايل، أو بين جوج بنات ولاجنسي حتى هي جريمة وكيعاقب عليها القانون، واش ماشي نوع من الحماق أنك تخرج منتوج وتكتب فيه كلمات زوينة كتعبر على الحب لي مايمكنش ليه يدار، دابا هانتا أو هانتي تلاقيتو عطيتو لبعضياكم ميريندينا فيها كنبغيك وتوحشتك وملي يوقفوا عليكم الصقور يسولوك شكون هاديك شنو غادي تقولو ليه، شفنا إشهار وبغينا نطبقوه في الواقع، ولنفرض حتى كاع مابقاوش كيوقفوا على عباد الله دابا، ولكن باقي كيدخلو عليهم للبرطمات والبراتش، وباقين الجيران كيجمعو الجوقة ويعيطو للبوليس، فاش يدخلو عليهم مالين الوقت ويقدموهم فساد آش غادي يقولوا لوكيل الملك وللقاضي داك الساعة.
في بلاد فيها العمارات معلقين بلاكة مع الباب مكتوب فيها ممنوع الكراء لغير المتزوجين آشمن حب غادي تدير أو تعيش أو تحس فيها، وفي بلاد كوبل غادين باغين يتخلواو فشي قنت كتلقى البراهش تابعينهم طلق الدجاجة لماليها دابا تحمل وتوحل فيها، وفي بلاد نهار البنت كتحمل من علاقتها كتكون مشكلتها غير هي ويقدرو يجريو عليها دارهم وتخرج من المدرسو تشوه وتشرد وحياتها تضيع، وفي بلاد لي التخلص من أطفال الحب حتى هو جريمة وكيمشي فيها الطبيب والفرملي والصاحب والصاحبة وحتى الجنين كانو يحبسوه غير فلت، جوج مراهقين ولا بالغين ماداروش الإحتياط ديالهم ووقع حمل غير مرغوب فيه وباقين ممستعدينش يتحملوا مسؤولية كائن حي يجي لهاد العالم وطبعا مايمكنش ليهم وهادشي فيه شلا حبس وشوهة .
فشي 2009 أو 2010 كنا هابطين من البولفار دطنجة وباقي بكري شيت سعود هاكاك ومعانا بنت، ومع الرومبوان ديال النجمة لقينا السطافيط والبوليس نازلين وكيوقفو أي واحد معاه بنت، ووقفونا طبعا والسؤال كان موجه لواحد الصديق كان هو لي قريب ليها جغرافيا آش كتجيك، هادشي راه ماشي التمانينات ولا السبعينات وماشي فشي مدينة مور الشمس غير شي بوليسي بغا يزيد من راسو هادشي في طنجة مدينة البحر والشمس وطنجة الدولية وبوابة افريقيا المهم مشينا وجينا في الهدرة مالقى تما والو قالنا الله يعاونكم وصحابي ماعدبهمش الحال ومشاو أسسوا عشرين فبراير وتتمة القصة كتعرفوها، هادشي يقدر يكون مابقاش دابا ، ولكن باقي نص قانوني كيعاقب، وباقي ناس كيدخلوا كل عام للحبس بسباب علاقة جنسية خارج اطار الزواج وبسباب الحب لي غير مرهون بكاغيط أو قيد أو شرط، ماحد كاين هاد القانون فراه هادي ماشي بلاد الحب وماشي بلاد كنبغيك هادي بلاد علق علق هاهوما جايين.
