كود -عثمان الشرقي//

من ديما وحنا صغار، كنا كنسمعو هاد السؤال وكيبقى يدور لينا في الراس: شكون اللي تخلّق الأول، الدجاجة ولا البيضة؟

القضية كانت  بحال شي حلقة مفرغة ما عندها بداية ولا نهاية نهاية، ولكن علماء البيولوجيا والتطور دخلوا على الخط وحسموا هاد القضية لصالح البيضة! إييه، البيضة هي اللي سبقات.

إلا هضرنا على البيضة بصفة عام  راه كانت موجودة فالأرض هادي ملايين السنين قبل ما يبان شي حاجة سميتها الدجاج.

الديناصورات والزواحف القديمة كانت كتبيض، يعني البيضة كفكرة وكاختراع طبيعي سبقات الدجاج بـبزاف ديال الوقت.

دابا ندوزو لـ “بيضة الدجاجة” ، العلماء كيقولو بلي شحال هادي، كانو جوج طيور كيشبهو للدجاج ولكن ما كيتعبروش دجاج حقيقي بنسبة 100% نقدرو نسميوهم ” الدجاج البدائي”،هاد الجوج طيور تلاقاو وتزاوجوا، وفاش الجينات ديالهم تخلطو، وقعات واحد الطفرة جينية.

هاد الطفرة عطاتنا بيضة جديدة ومبدلة شوية،مني فقصات، خرجت منها أول دجاجة حقيقية ف التاريخ، يعني هاديك الدجاجة الأولى ، راه خرجات من بيضة باضوها طيور ماشي دجاج.

يعني كون ما البيضة “المتحولة” اللي جابوها طيور قديمة، ما كناش غادي نشوفو الدجاج اليوم، وما كناش غادي ناكلو مطيشة بالبيض!