عمـر المزيـن – كود//

كولشي عاقل شهر شتنبر الماضي وتحديدا انهار 8 منو مللي تقطع الضو على التيران الكبير ديال فاس فمباراة المغرب والبرازيل بملعب فاس. فضيحة دفعات عدد من الجهات المعنية باش تصلح ما يمكن إصلاحه.

فاطمة كنون، المديرة العامة للوكالة المستقلة لتوزيع الماء والكهرباء بفاس كانت قالت لـ”كود” داك الساعة  باللي الفرق التقنية كانت كلها فالتيران لحظة انقطاع الضو للي رجع بعد شي دقائق.

هاد المسؤولة كانت وعدات في ذات التصريح لـ”كود” باللي غادي يخرج بيان رسمي باسم “لاراضيف” وتشرح فيه شنو كان وقع بالضبط لكن لحدود الساعة مزال مبان والو، وكانت أكدت باللي هناك بحث تفتح فهاد الشأن.

“كود” هضرات اليوم الثلاثاء مع العمدة عبد السلام البقالي، على وضعية التيران، وأكد أن ما وقع في مباراة المغرب والبرازيل أصبح من الماضي حقاش كان جا الزلزال وكولشي بقا مشغول فيه، وقال: “المهم دبا خاص يكون تيران يستجب للمعايير ديال الكاف وديال الفيفا”.

ووضح رئيس المجلس الجماعي لفاس باللي البروجيكتور ديال تيران فاس مكانوش ديال “Le led” ودبا غادي يتدار، وعبر المسؤول الجماعي عن أسفه من ما وقع فداك الماتش وما خلف ذلك من ردود فعل بين الجمهور الفاسي والوطني عامة بعدما تقطع الضو أكثر من 17 دقيقة على التيران.

وأكد البقالي أن التيران ديال فاس غادي تحط ليه 30 مليار درهم من الجامعة الملكية لكرة القدم والشباب والرياضة وباقي المتدخلين، مشيرا إلى أنه دبا خاصو يكون واجد شهر دجنبر 2024.