أميمة عطية – كود كازا ///
عاشو سكان الزنقة 6 بقطع ولد عايشة فدرب غلف بمدينة كازا، البارح السبت ليلة ديال الرعب، بعدما صبات الشتا وغرقات الزنقة بسبب مشكل القوادس لي محبوسين والواد الحار، وبالتالي لما دخل للناس لديور وتكرفسو ليهم حوايجهم وتكرفصو مزيان.
وحسب ما صرحات به الساكنة، فعدد منهم حطو شكايات كثيرة للقايدة والشركة الجهوية متعددة الخدمات “ليديك” سابقا، بحيث أكدو على أنهم ديما كيعيشو فلابيسين فاش كتصب شتا وبلي حتا مسؤول ماجا عندهم باش يشوف ليهم الحل.
وعبرو بيضاويين على الاستياء ديالهم من غياب تدخلات عاجلة من طرف الشركة الجهوية متعددة الخدمات المكلفة بتدبير القطاع، لي أصلا خدمتها فاشلة فمجموعة من المناطق بكازا، ولي وخا فصل الشتا قرب مخليا القوادس مخنوقين حتا الناس غرقو بالما. وزادو كالو سكان المنطقة ففيديوهات منتشرة فسوشيل ميديا أنهم بغاو المسؤولين لتابعين لدائرة الدار البيضاء آنفا، ولي كانو كايجيو يدورو عليهم فزناقي خلال الحملة الانتخابات وكيواعدوهم بالإصلاح يجيو دابا ويديرو خدمتهم ويوقفو معاهم.
الناس حسب الصور المنشرة تكرفصو مزيان، وبداو كيهزو لما غير بالسطولة في مشهد ماكيليقش بالتطلعات الكبرى للعاصمة الاقتصادية.
وهادشي خلا ملف البنية التحتية وتصريف مياه الأمطار من بين القضايا اللي كتستدعي تالتبع من طرف المنتخبين المسؤولين فمقاطعة المعاريف والمصالح التقنية المعنية.
ودابا من بعد تدخل الوقاية المدنية هاد الصباح، باقية الساكنة كتعاني من لما لي تسرب للديور، وكتطالب بتدخل مستعجل لمعالجة المشكل، وتوضيح الإجراءات اللي غادي تتخذ باش ما تبقاش المنطقة كتعيش نفس السيناريو مع كل تساقطات، مع ضرورة تفاعل الشركة الجهوية والجهات المحلية مع الشكايات ديال البيضاويين.

