محمد سقراط-كود///

كاين دول كثيرة خصوصا في آسيا أكثر تقدما وتطورا وغنى  ونظافة واحترام للقانون من المغرب، ومع ذلك كتلقى فيها الباعة المتجولين وخصوصا صحاب الستريت فود، كتلقى شوارع  طويلة ديال الستريت فود البعض منها كيمتد لكيلومترات وعندو تاريخ لمئات السنين، وتحولوا لمزارات سياحية كبيرة مشهورة في العالم، وكيزوروها أشهر مقدمي البرامج ديال الطعام والشيفات العالميين، وبعض هاد صحاب الستريت فود كاين في دليل ميشلان وكاين لي منهم عندو نجمة ديال ميشلان لي كتعطى لأحسن المطاعم والطباخين في العالم، وتحولو لأكثر من بلايص دالماكلة وصافي بل مزارات ثقافية كتعرفك على البلاد وهويتها وتقاليدها، بحال جامع الفنا في المغرب نيت.

ولكن من غير جامع الفنا راه فين مكتبغي تكون شي نواة ديال شارع دالستريت فود مستقبلي فشي مدينة في المغرب، كتلقى المقدم والقايد والمخازنية ليها بالمرصاد، فهم رجال الداخلية للشارع كأنه خاص يكون خاوي وكيدوزو فيه غير الطوموبيلات، وهادي صورة بدائية لعلم وفن التخطيط العمراني، خصوصا مع جيل زيد بزاف ديال الشباب كيفضلو يديرو مشاريع صغرى ديالهم ويبداو من كروسة دالماكلة وهادي ماشي عيب، راه كاين شيفان مشهورين في العالم وبنجمة ميشلان بداو من عربة طعام، راه كاين كرارس عندهم نجمة ميشلان، واعباد الله والدولة راه ستريت فود ثقافة وراه بدات كتطور اذن علاش الداخلية مبزطة الدراري لي دار شي كروصة فشي بلاصة تلقى المقدم واقف عليه.

عندنا ساحات وشوارع كثار في قلب المدن من المفروض يكونوا مطلوقين للستريت فود، بل الدولة خاصها تشجع وتنظم هاد القطاع، بلا دعم طبعا او غادي تشتت الفلوس غير هكاك راه شفنا دعم أسواق القرب كيفاش خلق أسواق للاشباح وفلوس كثيرة مشات غير هكاك، ابسط مثال ساحة بوجلود في الدخلة ديال المدينة هاهي خاوية كتصفر من المفروض تكون مزار وجنة ديال الستريت فود ويتطلق فرصة للشباب يبدع ويدخل أنواع جديدة ديال الماكلة او يطور القديمة، والدولة تخلص في هاد البلايص وتراقب الامن والنظافة، راه بسيطة ماشي شي حاجة صعيبة وتدارت في بلدان كثيرة علاش ماتدارش حتى عندنا.