كود ـ سبور//

كاين جدل كبير وسط الرجاويين بسبب التقرير المالي الأخير، اللي بيّن بلي كاين اختفاء ديال أكثر من ستة المليار سنتيم فمدة قصيرة ما كتفوتش شهرين. هاد الشي خلا بزاف ديال المنخرطين والجماهير يطالبو بتوضيحات حقيقية.

القضية بدات ملي تلغى الجمع العام التكميلي، اللي كان خاصو يوضح الحالة المالية ديال النادي. ولكن التقرير اللي تدار زاد عقد الأمور، حيث بان فيه أرقام ما مفهوماش، وعلى رأسها هاد المبلغ الكبير اللي اختفى.

من جهتو، جواد الزيات قال خلال اللقاء التواصلي اللي دار بعد إلغاء الجمع العام بلي هاد الشي غير إجراء محاسباتي باش يستافدو من إعفاء ضريبي ديال سنة 2025، ولكن هاد التبرير ما قنعش بزاف ديال المنخرطين، اللي بغاو تفاصيل أكثر ووضوح أكبر.

وزاد تعقد الوضع ملي طلعو خلافات بين بعض المسيرين السابقين، بحيث عادل هالا وعبد الله بيروين هضرو على اللجوء للقضاء عن طريق مفوض قضائي، بسبب اتهامات بخصوص مصاريف تزادت فالفترة اللي كانو فيها مسؤولين على النادي.

كاين حتى كلام من بعض المنخرطين على اختفاء أكثر من ثلاثة المليار فشهر واحد، وكيقولو بلي ما كايناش وثائق محاسباتية واضحة كتفسر فين تصرفات هاد الفلوس، وهاد الشي زاد طرح بزاف ديال التساؤلات وعلاش الرؤساء السابقين اللي اختفت هاد لفلوس فعهدهم ساكتين؟

دابا الشارع الرجاوي كيتسنى توضيحات رسمية، سواء من المسيرين السابقين ولا المكتب الحالي، حيث الثقة بدات كتهتز، خصوصاً والنادي كيعاني مادياً وما قدرش يلبي طلبات المدرب فالميركاتو الشتوي.

كاين حتى اللي كيهضر بلي المبلغ كامل يقدر يوصل حتى لسبعة المليار، وهاد الرقم صادم بزاف. وبين هاد التصريحات المتضاربة، السؤال اللي باقي مطروح هو: فين مشاو فلوس الرجاء؟