هناء أبو علي – كود////

وزارة الداخلية أو كيف كنعرفوها بـ”أم الوزارات” غادية بواحد الطريقة شويا متخلفة. الاحتفالات الأخيرة ديال عيد المولد النبوي فرشات  قرارات عدد من الولاة فمختلف الجهات المغربية وكول واحد كيفاش كيشرق وكول واحد كيفاش كيغرب ويتخذ القرارات اللي قاليه راسو بسبب منع المشروبات الكحولية! لكن هادشي كيضر لبلاد كولها. وراه خاص الداخلية تحسم فهادشي بقرار واحد. ماشي شي يغرب وشي يشرق. راه غير  العبث خصوصا انه كايضر القطاع السياحي و كاينعش التهريب و البيع السري للكحوليات ومنها اللي يقدر يصيفط العشرات من المستهلكين للمستعجلات.

مراكش:

عاصمة النخيل عندها واحد الوالي داير بحال شي فقيه. أكبر مدينة سياحية فالمغرب بغا يخرج عليها هاد الوالي اللي عاد تعين مؤخرا. السيد اصدر وقف الشراب على المحلات التي تقدم المشروبات الكحولية لمدنة 48 ساعة بالمناسبة ديال عيد المولد النبوي.

كازا:

كازا لي هي العاصمة الاقتصادية ديال لبلاد بدورها منعو فيها الشراب فهاد العيد لكن الوالي ديال كازا رشقلو يوقف المشروبات الكحولية ويعطي فترة  استراحة  لـ”سكايرية” لمدة 24 ساعة فقط..

فاس:

سعيد زنيبر والي جهة فاس مكناس لي جابوه لهاد من المنصب من وزارة السكنى والتعمير لي كان فيها كاتب عام كيشرشم فالسياحة ديال فاس. فقد قرر منع الحانات والملاهي الليلية من بيع الشراب لمدة 3 أيام. لمدينة أصلا ميتة وبغا يزيد يقلتها حسب عاملين ف القطاع. فاسة معندهوش شي متنفس فين يمشيو من غير عدد من المحلات لي كتدير التنشيط لكن الوالي بغا لمدينة تبقا كيف هي.