گود سبور//

فرگع رشيد روكي مدرب شباب المحمدية الرمانة، وكشف الوضع الصعيب اللي كيعاني منو الفريق ملي بدأ الموسم، بسبب عدم توصل اللاعبين بالمستحقات ديالهم الشي اللي مخليهم يديرو الإضرابات، وأن الوضع كارثي فالفريق وحتى حد من المسؤولين ما مسوق، وأكد أن شباب المحمدية غادي للهاوية، وهذا الوضع اللي عراه روكي، كيخلي جماهير الشباب والمتتبعين للكورة المغربية، يطرحو سؤال عريض فين مشى هشام أيت منا الرئيس السابق، وخلى الفريق لأشخاص ما فيدهومش.

وهضر رشيد روكي ولد شباب المحمدية واللي مقاتل دابا مع الفريق، وقال بعد الخسارة بنتيجة 5 لجوج مع الوداد فالبطولة ضمن الدورة 17: “الماتش كان ضد الوداد الرياضي، الفريق الكبير وبكل صراحة كنا عارفينو غيجي يلعب بهاد الشراسة من الخسارة مؤخرا مع الفتح والمشاكل اللي كانت عندهم، الشوط الأول كان ممكن تخرجو معادلين بالنظر للفرص اللي ضيعنا، ولكن فالشوط الثاني بان الفرق بين اللاعبين اللي كيترينيو واللاعبين اللي ما كيترينيوش وهادي ضريبة 58 يوم بلا تداريب، وبانت اليوم وفالماتش الماضي ضد ليفا، وفريق المحمدية فالشوط الثاني انهار بدنيا امام الوداد، اللي خلقو فرص كثيرة وماركاو 5 الأهداف، وكان يزيد الغلة”.

وكشف رشيد روكي شنو واقع داخل الفريق وقال: “مصير شباب المحمدية بين يدينا وبين يد المسؤولين، حيث بصراحة كان التوقف ديال كأس أفريقيا كان ممكن نستافدو منو وكاع الفرق استفادت منو ودارو معسكرات إلا شباب المحمدية، فالمسؤولين عليه كانوا غايبين بشكل تام على اللاعبين اللي مضربين على التداريب وحتى حد ما كيسول عليهم، وهادي ضريبة ديال عدم التدرب وعدم التوصل بالمستحقات، يمكن أغلب الفرق كنعاني من مشاكل مالية، ولكن شباب المحمدية عندهم مشاكل مالية ومشاكل ديال التداريب، وكنا حذرنا من هادشي من بداية الموسم بأن الفريق غينهار، ووصل الوقت وإذا ما تحدوش مسؤولين المحمدية والغيورين عليها فشباب المحمدية غاديين للهاوية”.