وكالات//

المدير المؤقت ديال “ناسا”، شون دافي، عطى أوامر باش يسرّعو الخدمة على تطوير مفاعل نووي باش يخدمو بيه فوق القمر. شدد على أن هاد التكنولوجيا مهمة بزاف، حيت غادي تعاون فبناء اقتصاد فوق القمر فالمستقبل، وتوفير الطاقة اللي كتطلب بزاف فوق المريخ، وحتى فـ تعزيز الأمن القومي فـ الفضاء.

وحسب جريدة “بوليتيكو”، دافي عبّر على تخوفو من الخطط اللي عند الصين وروسيا، اللي ناويين يديرو مفاعل نووي على القمر حتى هو، فـ منتصف الثلاثينيات. وهما داخلين فمشروع مشترك باش يبنيو قاعدة قمرية. وقال باللي إلى سبقونا، يقدرو يعلنو منطقة ممنوعة، ويمنعو أمريكا تدير عمليات ديالها فوق القمر.

التوجيه اللي عطاه دافي فيه تعليمات باش يتعيّن مسؤول فـ”ناسا” لمتابعة هاد المشروع فـ مدة ما تفوتش 30 يوم، وكيسناو الشركات التجارية تقدم عروضها فـ مدة ما تفوتش 60 يوم. المفاعل خاصو يعطي على الأقل 100 كيلوواط من الطاقة، اللي كتقدر تكفي تقريبا 80 دار أمريكية، وخاصو يكون واجد للإطلاق قبل ما يسالي عام 2029.

وبغات “ناسا” تدير هاد المفاعل فوق القمر حيت الظروف فوق القمر قاسية بزاف. النهار القمري كيدوم تقريبا 4 سمانات ديال الأرض، جوج سمانات ضو وشمس، وجوج سمانات ديال ظلمة وبرد قارس. وهاد الشي كيخلي الطاقة الشمسية والبطاريات صعيبة باش تكفي، خصوصا فالقطب الجنوبي ديال القمر، اللي “ناسا” وروسيا مع الصين مركزين عليه فـ الاكتشافات. كاين حتى بعض الحفاري (الفوهات) اللي ما كيوصلهاش الضوء نهائيا، وهاد الشي كيصعّب بزاف كيفاش تأمن الطاقة.