كود هناء ابو علي ///

سناء رحيمي صحافية القناة الثانية كتعتاقد باللي القناة ديالها. فبرنامج على الانتخابات مع جامع كولحسن هادي يومين استضفات الامين العام للحركة الشعبية محمد اوزين. هاد الصحافية لقاتها فرصة باش تصفي حساباتها مع “شوف تيفي”. هاد الاخيرة سبق ليها كثر من مرة انتقداتها وكتبات عليها. لالة سناء تسنات حتى جا اوزين اللي عارفة موقفو من قناة “شوف تيفي” وعطاتو بيلانتي.

قالت ليه باللي تسول شي واحد من ابناء المنطقة حضر لنشاط ديال الحركة الشعبية وسولو فين غادي. قال ليه ما عارفش وغادي للسفة والمرقة وللحم.  رحيمي كتهدر على نشاط دارتو الحركة عند ولد زروال فدكالة. هاد ولد زروال امبراطور لفراقشية واللي جرى عليه البام ورفضاتو 3 احزاب اخرى قبل ما يحتاضنو اوين.

وبغات تماكيي سؤالها اللي عندو نية مبيتة، باللي تنتاشر فوسائل التواصل الاجتماعي وهي عارفة شكون صورو. طبعا اوين شكرها على السؤال. وبدا يسب. “كاين واحد المنبر ردئ ومعروف بالرداءة ديالو….. والفيلم راكم عارفينو. الاستاذة الصحافية ما وقفاتوش بل بقات كتشعل فيه باش يعاير. هو تناقض مع راسو باش قال “قالو راه جابو الناس. معلوم نجيب الناس.

وقال باللي الفيديو مفبرك. اي متبدئ يعرف باللي اوزين ما قالش الحقيقة وباللي ماشي مفبرك. الناس جاو للقاء، وكاينين فيديوات كثار، على ولد زروال وما كيعرفو لا الحركة الشعبية لا اوزين.

الصحافية ما دخلاتش. بانت فرحانة وهي ما كتقومش بخدمتها. تبورد كثر من دقيقة فقناة عمومية ضد “شوف تيفي”.

ولد زروال عندو سوابق. كلشي عاقل على مسيرة ولد زروال اللي جات لكازا باش تخرج بنكيران من المغرب ….. ديك المسيرة العبثية بحال مطالبها العبثية.

حتى كولحسن ما دخلش ما دارش خدمتو وخلى رحيمي تفضي حساباتها مع “شوف تيفي”. هنا خاص الهاكا تدخل بلا ما تقدم شوف تيفي شكاية.  راه خطير انو يجي لقناة عمومية بتواطؤ مع صحافية زمن الانتخاب باش يدوز شي حد مغالطات كثيرة فيها حتى المال العام. راه دعم المقاولات العمومية كاين فقانون المالية. هاد القانون ممكن يتغير ولكن بالطرق القانونية. كلشي اللي قالو مغالطات. ما كانش فبركة الفيديوات. ما كانش استضافة وحدين ما عندهم علاقة. وكلشي دوزاتو لالة سناء بلا ما تدخل ودير خدمتها. هادي مسؤولية حتى مديرية الاخبار والادارة العامة ديال القناة