كود سبور//

ما منعتش الخسارة الثقيلة اللي تعرض لها النجم البرازيلي فينيسيوس جونيور مع الفريق ديالو ريال مدريد أمام البارصا فالكلاسيكو السبت برسم الجولة 11 من بطولة الصبليون برباعية، من التعبير على التضامن مع نجوم البارصا لامين يامال الإسباني من أصل مغربي وأنسو فاتي الإسباني من أصول أفريقية والبرازيلي رافينيا دياز ضد حادث العنصرية اللي تعرضو له فالماتش.

وخرج فينيسيوس جونيور مساء أمس الاحد، ونشر تغريدة على الحساب الشخصي ديالو فتطبيق “X” قال فيها: “داكشي اللي وقع البارح فالبرنابيو من إهانات عنصرية أمر مؤسف، لا مكان لهؤلاء المجرمين فمجتمعنا، وكل دعمي للامين وأنسو ورافينيا، وراني عارف ريال مدريد والبوليس غايديرو كل ما هو ممكن باش يعرفو الجناة ويعاقبوهم.

وكان ريال مدريد الإسباني خرج ببيان صباح اليوم الاحد. عبر فيه بشدة على إدانة النادي للعنصرية أو كراهية الأجانب أو العنف في كرة القدم والرياضة، وتأسف بشدة للإهانات اللي صدرت من عدد ديال المشجعين البارح فالكلاسيكو فالتيران، وأعلن فتح تحقيق باش يعرفو هوية مرتكبي هذه الأفعال وأكد انه غادي يتعاقبو قضائيا.

للإشارة فالبرازيلي فينيسيوس جونيور، تعرض شحال من مرة للعنصرية فتيرانات الصبليون، وآخرها الماتش ديال هذا الموسم بين ريال مدريد وأتليتيكو مدريد، وراه مشدودين 4 الأشخاص بتهمة التحريض على العنصرية ضدو.