الرئيسية > آراء > فيناهوا داك الوعي لي كنتو كاتهضرو عليه ؟ قمة الكالاخ و الاستهتار شفت البارح فاش خرجت للزنقة ! صافي الناس نساو الكمامة و مابقاوش كايطبقو التباعد الاجتماعي ! و لا الدولة مادخلاتش و فرضات الغرامات قاسية على عباد الله راه فحال والو لي حرثو الجمل يدكو !
14/07/2020 18:00 آراء

فيناهوا داك الوعي لي كنتو كاتهضرو عليه ؟ قمة الكالاخ و الاستهتار شفت البارح فاش خرجت للزنقة ! صافي الناس نساو الكمامة و مابقاوش كايطبقو التباعد الاجتماعي ! و لا الدولة مادخلاتش و فرضات الغرامات قاسية على عباد الله راه فحال والو لي حرثو الجمل يدكو !

فيناهوا داك الوعي لي كنتو كاتهضرو عليه ؟ قمة الكالاخ و الاستهتار شفت البارح فاش خرجت للزنقة ! صافي الناس نساو الكمامة و مابقاوش كايطبقو التباعد الاجتماعي ! و لا الدولة مادخلاتش و فرضات الغرامات قاسية على عباد الله راه فحال والو لي حرثو الجمل يدكو !

سهام البارودي – كود//

البارح كان خاصني نخرج نقضي شي غرض ف موسيو بريكولاج فكازا ! و يا ليتني ماخرجتش ! حيت كتاشفت بلي واقيلة بوحدي انا و شي شوية د الناس لي دايرين الكمامة فالمحلات الكبرى و حتى فالزنقة ! الناس نساو دوك شروط السلامة لي مفروضة ! قليل لي داير الكمامة اما التباعد الاجتماعي هاداك ماكاينش وواخا تبغي دير بينك و بين الناس ميترو غايجي شي واحد يتخشا بيناتكم فداك الميترو فحال القضية ديال مسافة الامان فالصوگان و لي تاهي صعيب تحتارمها فالمغرب !

قمة الجهل و الاستهتار شفت بعيني البارح ! عائلات على قدها خارجة بولادها و تاواحد ماداير الكمامة ! الشباب لي زعما يا حسرة قاريين شوية و خاص يكونو واعيين حتى هوما بلا كمامات ! الناس كايصحابهم راه صافي “سالات كورونا” و كايتعاملو بواحد الاستهتار كبير بشروط السلامة الصحية!

هادشي مؤلم الصراحة ! مؤلم انك تشوف بلي الناس لي كاتشارك معاهم الاكسيجين ماواعينش بخطورة الوضع و بلي مستحيل الدولة تبقا تابعاهم و كاتسد فالمدن ! حل هادي تسد ليك الاخرى ! راه الاقتصاد كايموت و الناس كاتعاني ! البارح تسدات اسفي ! موراها طنجة ! و شكون المدينة لي غاتجي من بعد؟ كازا ؟ قنيطرة؟ الرباط؟ حتى لين غادي نبقاو نخلصو من جيوبنا و ضرائبنا و صحتنا النفسية الثمن ديال الجهل د شي وحدين و استهتارهم!

واش الدولة صعيب عليها تفرض غرامات على عباد الله لي مامحتارمينش شروط السلامة ؟!  حنا عارفين خروب بلادي و عارفين بلي المغربي لاماضربتيهش لجيبو راه ماعمرو يسمع ليك واخا ضل تخبر ليه حدا ودنيه! اذن علاش الدولة مرخية فهادشي؟

حماية لينا و الاقتصاد ديال البلاد خاص الدولة تكون اكثر صرامة فهاد الفترة و كيما شفنا قايد داخل لمطاعم راقية يراقبهم و فالتالي فرض عليهم غرامات حيت مامحتارمينش شروط السلامة خاص السلطة تشحط بالغرامة حتى داك المواطن أبو جهل لي مطنگ و ماباغيش يلبس الكمامة باش يخاف شوية و يحشم من راسو حيت هوا اساس البلا و راس المحاين.

موضوعات أخرى

14/08/2020 07:00

باش يديرو الخاطر لترامب.. ميريكان بغات تزيد فالما ديال روبنيات الدوش بعدما تشكى الرئيس من الروتين الخاص بغسيل شعرو

13/08/2020 22:28

واش عدد الوفيات بكورونا فيروس كثير؟ مدير منظمة الصحة العالمية: العدد ضعيف ولكن غادي فمنحى تصاعدي وخاص اجراءات صارمة باش يوقف هاد الشي