فاطنة لويزاـ كود//
نهار الأحد كان فينال كأس العرش في فاس، ولي كيما هو معلوم كان بين أولمبيك آسفي والنهضة البركانية.
أول ملاحظة هو أن الفينال كان بعيد على مدن المركز، بمعنى ماوصلات ليه لا راجا ولا وداد ولا الجيش الملكي ولا الفتح.
وهادا كيعني أن عهد الاحتكار الكروي بدا يمشي.
البطولة خداتها بركان، والكأس خداتو آسفي.
واخا أنا ودادية، ولكن بصراحة خاص جمهور كازا يتواضع شوية، ويخرج كم ديك الإيكو المتضخم.
اليوم الراجا والوداد بحالهوم بحال باقي فراقي ديال البطولة، إذا ما قولناش بلي هاد العام المستوى ديالهوم كان أضعف من بركان والجيش والفتح، وفي نفس مستوى آسفي والمغرب الفاسي والزمامرة.
هادشي كيعني أنه ما يمكنش تبقا تعتمد على التاريخ فقط.
اليوم من حيث التسيير مثلا فراه بركان والفتح هاربين على الراجا والوداد.
نرجعو للفينال.
أغلبية المغاربة لي تبعو الفينال كانو متعاطفين أكثر مع آسفي.
وهادشي عندو بزاف ديال التفسيرات المتداخلة.
منها أن أولمبيك آسفي معندها حتى تيتر، وهادي مناسبة أن مدينة بحال آسفي تفرح، فيما النهضة البركانية كاع الألقاب المحلية والقارية دارتليهومحب وتبن في السنوات الأخيرة.
ومنها كذلك الفرق الكبير بين الفرقتين من حيث الإمكانيات المادية والبشرية، فأولمبيك آسفي يمكن كيتسير بربع الميزانية ديال النهضة البركانية او أقل، وعادة الناس كيتعاطفو مع الفرق الضعيفة المادية.
وكاين سبب ثالث وهو شعور بزاف ديال متتبعي الكرة في المغرب بلي كاينمحاباة من طرف الحكام لفريق النهضة البركانية.
واش هاد المحاباة كاينة؟
قبل منجاوبو على هاد السؤال خاص نتفقو على واحد الحاجة، انه بالمحاباة أو بدون المحاباة كانت بركان غتدي البطولة هاد العام.
ببساطة حيت أي واحد منصف غيقول إن النهضة البركانية هاد العام كانت أفضل بكثير من باقي الفرق، وبدليل الفرق في النقط بينها وبين الثاني، وبدليل أنها حسمات البطولة بكري، وبدليل أنها وصلات لفينال كأس العرش واخا هي أكثر فريق لعب بزاف دالمقابلات، وبحكم أن بركان موجودة في أقصى الشرق، فلكم أن تتخيلوا عدد الكيلومترات لي ضربتها هاد الفرقة، وبدليل أخيرا أنها خدات وبسهولة كأس الكونفديرالية الإفريقية. وهادشي مستحيل يكون بالتحكيم.
دابا نرجعو للتحكيم.
الصراحة أنه فبعض المقابلات كان تحيز واضح للتحكيم لصالح نهضة بركان.
غير هو السؤال: واش كان بتوجيه من رئيس الجامعة؟ أو من رئيس العصبة الاحترافية؟
أكاد أقول يستحيل.
حيت لقجع غيكون أكبر متضرر إذا تسرب أنه مارس ضغط على شي حكم، وغتضرب السمعة ديالو والسمعة ديال الكرة الوطنية سواء في الكاف أو الفيفا، وديك الشي لي تبنا كلو غيريب، لذلك السيد ماشي مسطي يحط راسو في شبهات بحال هادي.
رئيس العصبة الاحترافية معروف أنه رئيس فرقة منافسة لي هي نهضة الزمامرة، وكلشي كذلك كيعرف بلي السيد راه رجاوي من ديما، لذلك ما عندو حتى هوى ولا مصلحة مع بركان.
ومن هادشي كلو بركان ما محتاجاش هاد العام لهدايا الحكام في ظل الفرق الكبير بينها وبين الفرق الأخرى.
كيبقى الاحتمال الوحيد هو أن هاد الحكام لي تورطو في التحيز لبركان إن كان فعلا.. وهم على أي معدودين على رؤوس الأصابع، دارو هادشي من راسهوم.
علاش؟
حيت كيسحابليهوم ممكن يحصلو على شي حاجة من ورا هادشي، أو حيت خايفين ينتقمو منهوم إذا خسرات بركان في ماتش هوما كيسيفليو فيه، أو فقط تبنديقا للقجع.
وما أكثر البنادقية فهاد البلاد.
وهادشي ماشي جديد في عالم الكرة في المغرب.
كانو بنادقية ديالا ادريس البصري لي باغين يربحو النهضة السطاتية بزز.
وبنادقية المديوري مع الكوكب المراكشي.
وبنادقية الدليمي مع اتحاد سيدي قاسم.
وهادا الدرس لي خاص تستافد منو نهضة بركان.
أنه متعاودش سيرة مراكش وسطات وسيدي قاسم
وانا كنظن أن براكنة واعيين بهاد الشي.
بدليل أنهم خلافا لمراكش وسطات وسيدي قاسم استثمرو في التكوين القاعدي وفي البنية التحتية الرياضية، وفي التسيير العصري المعقلن والحديث.
صحيح أن بصمة لقجع حاضرة في النهضة ديال النهضة البركانية.
ولكن النهضة اليوم غادة بلا لقجع.
السيد تراسا التيران وبعد.
تكلمنا على التبنديق ديال شي حكام.
دابا أراك لواحد التبنديق آخر ديال السياسيين.
الناس لي كيحضرو الجلسات العامة وأشغال اللجن في مجلس النواب بغرفتيه، كيعرفو أن أكبر حضور ديال البرلمانيين كيكون نهار غيجي لقجع.
وكيحضرو اكثر من نهار لي كيجي رئيس الحكومة أو وزير الداخلية.
مع العلم أنه وزير منتدب لدى وزيرة المالية فقط.
وكلشي كيعرف بلي هاد ممثلي الأمة زعما كيجيو وكلها معه شي ملف وباغي الرضا ديال السي لقجع، حيت هو مول الشكارة.
مع العلم أن السيد عطا شحال من إشارة بأنه من أنصار “يا ما ارحميني”، يعني معندوش مع التملص الضريبي والكاشيات من تحت الطبلة.
ولكن لي فيه حرفة التبنديق راها فيه.
في مقابلة النهاية ديال كأس العرش، شفنا فيديو مسيئ للمغرب، وللكرة الوطنية، وللسياسة وكلشي.
وهو مجموعة من الكيران وسطافيطات النقل المزدوج جاية من تاونات وتاهلة وغفساي وتازة، وفيهوم شباب وقاصرين لابسين تيشورتات بحال ديال نهضة بركان، وكاسكيطات ديالها، وعاطيينهوم سندويش وقرعة مونادا وقرعة ديالالما، والتيكي باش يدخلو للتيران.
هاد الشباب والقاصرين ما عندوهم علاقة بمدينة بركان، ولا مشجعين ديال الفرقة .
وملي سولوهوم شي مواقع كانت كتغطي الماتش، جاوبو بلي جمعيات تابعة للجماعة، وبلي الحاج المنتخب ديالهوم، وبلي الجماعة ديالهوم هي لي جابتهوم.
مسيرة “ولد ،…” الثانية وخلاص…
دابا شنو لي غيخلي منتخبين من تاهلة أو تاونات او تازة يديرو هادشي.؟
واش بركان محتاجة تسلف جمهور من مناطق شبه قروية وقروية؟
كاين لي غيقول السلطة ورا هادشي باش يبان التيران عامر.
ولكن السلطة حتى إذا بغات التيران يعمر كانت تخلي الماتش فابور، وتجيب عباد الله غير من فاس، نيت مع الحرارة مكاين ما يدار نهار الاحد.
بركان براسها ما محتاجاش لجمهور كبير فالتيران، حيت ما لاعباش ضد فاس أو طنجة أو الرجا أو الجيش أو الوداد لي عندوهم جمهور كبير يقد يغطي على جمهور بركان.
أسفي مدينة صغيرة، زايدة غير شوية على بركان من حيث المساحة، والمسافة بين آسفي وفاس أطول من المسافة بين فاس وبركان.
إذن كان معروف أنه مغيكونش شي عدد كبير ديال الجمهور.
إذن فرضية أ، مسؤولي النهضة البركانية ورا ديك الفضيحة مستبعدة او بزاف …
السؤال: علاش دوك المنتخبين دارو ديك الشوهة؟
الجواب هو بحال حالة الحكام: التبنديق.
دابا هادو سحابليهوم بلي سوارت الحكومة الجاية فيد لقجع، حيت هو لي كيدبر زعماكينا ملف المونديال.
أرا نتبندقو ليه.
شخصيا كنظن بلي على النيابة العامة تفتح تحقيق فديك الشوهة حيت فيها شلا جنح.
كاين دوك القاصرين لي سفرهوم بلا علم والديهوم وبلا رخصة منهوم.
كاين التنقل الجماعي دون ترخيص.
كاين شبهات القيام بحملة انتخابية سابقة لأوانها.
كاين شبهة إرشاء انتخابي.
مشكل لقجع أنه شخص ناجح لا في تدبيره لقطاع الميزانية، ولا في تدبيره لشؤون جامعة الكرة، ولا في قدرته على أنه يخلي للمغرب وزن في الكاف والفيفا.
هادشي جابو بالخدمة ديالو، فالسيد مكينتمي لعائلة أرستقراطية، ولا قرا في جامعات دولية كبرى لي كيقراو فيها ولاد الألبة، ولا كان عند وشي ضرسة صحيحة.
المجد ديالو كلو بناه في البلاد، وهو خريج المدرسة العمومية.
في بلاصة ما نحولوه إلى قصة نجاح مغربية، ويكون قدوة للشباب ديالالهوامش بالخصوص، كاين لي باغي يحطم هاد الصورة.
ويرجعنا إلى مقولة: لي معندو سيدو عندو لالاه.
وهاد البنادقية هادا هو دورهم.
ولذلك خاص سي فوزي حتى هو ميبقاش يتساهل مع التبنديق.
وختاما برافو آسفي، وبالتوفيق لبركان، وتفو على البنادقية.
موضوعات أخرى
